Miles de persones salieron a la cai esti llunes en dellos puntos d'Arxentina pa manifestase y reclamar xusticia pola muerte del fiscal Alberto Nisman, que denunciara a la presidenta Cristina Fernández de Kirchner y al canciller Héctor Timerman por tapecer a los iraninos sospechosos de llevar a cabu l'atentáu de 1994 contra l'Asociación Mutual Israelina Arxentina (AMIA) en Bonos Aires.
Tres una convocatoria realizada al traviés de les redes sociales, baxo la conseña 'Toos somos Nisman', miles de persones acudieron a delles de les zones más representatives de delles ciudaes arxentines pa pidir que s'esclaren les circunstancies de la muerte del fiscal. El so cuerpu apaeció sin vida nel bañu de la so casa de Bonos Aires, con un disparu realizáu xusto enriba de la so oreya derecha con una pistola del calibre 22.
Les marches secundóles tamién la Unión Cívica Radical (UCR), qu'aseguró, al traviés del so presidente, el senador Ernesto Sanz, que van promover movilizaciones en tol territoriu nacional. Munchos manifestantes acudieron a estes convocatories al traviés d'Internet con carteles contrarios al Gobiernu de Fernández de Kirchner.
Les principales concentraciones y 'cacerolazos' hasta esti momentu tuvieron llugar frente a la Residencia Presidencial d'Olivos, la Plaza de Mayu y distintos barrios de Capital y Gran Bonos Aires, tal como informó'l diariu arxentín 'Clarín', qu'aseguró que se vivieron momentos de tensión cuando dellos manifestantes intentaron quitar valles de protección colocaes pola Policía.
