Madrid (E.P.).-La película '71', dirixida por Yann Demange, va llegar a los cines españoles esti próximu vienres 21 de xineru pa mostrar los disturbios en Belfast (Irlanda del Norte) a primeros de la década de los 70 al traviés de los güeyos d'un militar abandonáu pol so reximientu na zona de conflictu.

   La película de Demange, que recibió dos nominaciones nos premios Bafta (a meyor película británica y meyor guión), recurre a la cámara en mano en numberoses escenes d'acción pa mostrar un enfrentamientu paramilitar "con un tonu universal", según esplicó'l director nuna entrevista con Europa Press.

   Gary ye un mozu soldáu británicu deseando entrar en batalla en cualquier llau d'Europa. Sicasí, al so reximientu van destinalu a Irlanda del Norte, onde los enfrentamientos ente católicos y protestantes, cola independencia como telón de fondu, tán cobrándose numberosos muertos.

   Tres una incursión fallida nuna zona de conflictu, Gary va quedar solu al acudir a recuperar un fusil d'asaltu a un mozu que lu robara. Cola retirada del restu de los militares, el protagonista tendrá qu'escapar d'una ciudá na que naide paez querer ayudalu, puesto qu'hai una guerra tapecida.

   Demange trata'l problema independentista intentando "nun esplicar la ideoloxía de tol mundu, sinón enseñar el "llau humanu". D'esta manera, nin los axentes infiltraos ente los norirlandeses o los distintos líderes de cada bandu, toos ellos optando pola violencia como solución, muéstrense como personaxes "que nun son nin bonos nin malos". "Quería evitar la ruta fácil, enseñar solo'l blancu y negru", apuntó.

   El director británicu contaba con numberosos precedentes na gran pantalla que trataben esti enfrentamientu, dende 'En el nombre del padre' (Jim Sheridan) hasta 'El viento que agita la cebada' (Ken Loach). Sicasí, Demange reconoció que la película que-y vieno a la cabeza foi 'Hunger', el drama sobre'l líder del IRA, Bobby Sands, filmáu por Steve McQueen.

   "Cuando me dixeron de primeres que se trataba d'un guión sobre Irlanda del Norte sospiré, porque dempués de 'Hunger' ye bien difícil igualar esa obra maestra. Pero'l guión tenía la so propia personalidá, conecté en tolos niveles y va más allá y tresciende de los disturbios", esplicó'l realizador, que s'estrena nel llargumetraxe tres dellos trabayos pa la televisión ('Dead Set: Muerte en directo').

ATAQUES EN PARÍS Y ETA

   Preguntáu sobre los recientes ataques terroristes en París, Demange reconoció que nun se siente "cómodu" pa opinar, por cuenta de la cercanía nel tiempu del atentáu. "Ye deprimente pero tovía nun se procesó lo que significa, precísase distancia emocional pa falar sobre ello", indicó, en recordando que nun se debería rellacionar "con esti filme".

   Nel casu d'ETA, tampoco opinó, magar esplicó que tuvo n'España en delles ocasiones dende neñu, aseverando que se percibe "munchu dolor dende la época de Franco". En tou casu, nun refugó que salga "una bona película" sobre la banda terrorista nos próximos años, puesto que "igual hai munchos guiones" esperando un productor "con valentía" pa facela.

   Nesti sen, repitió que pa rodar una película sobre esti tipu de conflictos "nun hai riegles" y, poro, nun ye necesario que trescurran dellos años de l'acabación del conflictu. "Mira Estaos Uníos, puen tratar estos atauqes aína, mientres qu'en Francia, por exemplu, tovía nun hai una película significativa sobre'l conflictu d'Arxelia. Cada cultura tien les sos idees", acabó.