L'etarra Josu Uribetxeberria Bolinaga, condenáu pol asesinatu de trés guardies civiles y pol secuestru del funcionariu de prisiones José Antonio Ortega Lara, morrió esta madrugada, según fontes conocedores de la so situación.
Bolinaga, que tenía cáncer, taba fuera de prisión por mor del calter terminal de la so enfermedá dende setiembre del 2012 por decisión de l'Audiencia Nacional. Poco antes el Gobiernu concediéra-y, pol mesmu motivu, el tercer grau penitenciariu, una midida qu'enfrentó al Executivu coles asociaciones de víctimes.
El pasáu miércoles, el ministru d'Interior, Jorge Fernández Díaz, recordó qu'hai cuatro decisiones xudiciales en favor de la llibertá condicional de Bolinaga. Nuna entrevista en RNE recoyida por Europa Press, el ministru yá dexó ver lo avanzao de la enfermedá que sufría l'etarra.
Esta mesma selmana la Fiscalía de l'Audiencia Nacional pidió pa él 29 años de prisión, acusándolu d'asesinar, el 8 de xunu de 1986, al axente de la Guardia Civil Antonio Ramos Ramírez na población guipuzcoana de Mondragón, xunto con otros dos etarres, Javier Ugarte Villar y José Luis Erostegui. El fiscal acusólu de ser el "l'autor material" del asesinatu, encargáu d'efectuar los disparos qu'acabaron cola vida del axente.
Por esti mesmu crime'l xuez de l'Audiencia Nacional Ismael Moreno ordenó n'abril del 2014 prisión domiciliaria pal etarra, dempués d'un añu y mediu en llibertá condicional. Sicasí, en xunu la Estaya Segunda de l'Audiencia Nacional estimó'l recursu de Bolinaga y anuló la midida, dexándolu volver a la llibertá condicional.
