Dos supuestos yihadistes morrieron esti xueves nel marcu d'una gran operación antiterrorista llanzada pola Policía federal belga en Bruxeles y otres poblaciones del país. La Fiscalía informó de que la operación activóse ante'l "riesgu inminente" d'un atentáu.

   Un voceru de la Fiscalía federal informó nuna rueda prensa de que la operación sigue en marcha y activóse ante la sospecha de que los grupos vixilaos preparaben un atentáu "d'envergadura" en Bélxica y "de manera inminente".

   La cadena pública RTBF apunta que l'oxetivu de los atentaos yeren edificios de la Policía y añade que les autoridaes decidieron actuar esti xueves tres la información atropoada al traviés d'escuches nes cases y vehículos de los supuestos terroristes.

   Los sospechosos contra los que se dirixó'l dispositivu son nuevos que tornaren al país en pasando una temporada en Siria.

   L'operativu llanzóse simultáneamente en delles poblaciones belgues, con "una decena de redaes" en Bruxeles, dellos conceyos de la periferia, como Zaventen y Vilvoorde, y en Verviers, una población del este del país próxima a la frontera con Alemaña y considerada como ún de los focos del yihadismu en Bélxica.

   L'asaltu en Verviers saldóse cola muerte de dos sospechosos y la detención d'un terceru, que resultó firíu, nuna operación realizada sobre les 17.00 hores y mientres la que s'escucharon delles esplosiones y rabaseres de disparos.

   Les autoridaes evualuaron la situación d'alerta terrorista del país y decidieron elevar el nivel de vixilancia de 2 a 3, nuna escala de 4. Amás, la sede de la Policía federal na capital desagospióse esta tarde por una amenaza de bomba.

   Les fontes de la investigación citaes por dellos medios belgues desvinculen esti operativu de los atentaos asocedíos la pasada selmana en París y espliquen que les distintes redaes en Bélxica taben en marcha selmanes antes.

   La Fiscalía informó de lo asocedío nuna comparecencia ante la prensa sin preguntes y evitó dar más detalles por cuenta de que la operación sigue en marcha. Les autoridaes tamién confirmaron qu'hubo delles detenciones, sin ofrecer más detalles.