Bruxelles (E.P.).-La comisaria d'Empléu, Marianne Thyssen, dixo esti xueves que l'altu nivel de paru xuvenil n'España ye "insostenible" y apuntó que la elevada segmentación ente contratos fixos y temporales sigue siendo unu de los principales problemes del mercáu llaboral, lo que podría requerir más reformes.
"N'España la tasa de paru ye alta, especialmente ente los mozos la tasa de paru ye bien alta, demasiáu alta, y nun ye sostenible, pero hai una meyora", dixo Thyssen mientres una rueda prensa pa presentar l'informe sobre la situación del empléu na UE nel 2014.
"La segmentación del mercáu llaboral ye bien alta n'España y ésti podría ser unu de los puntos nos qu'España podría meyorar", señaló la nueva comisaria d'Empléu. L'Executivu comunitariu va estudiar agora tolos datos y va formular nuevos encamientos al Gobiernu de Mariano Rajoy en primavera, que podríen incluyir "la necesidá de reforma del mercáu llaboral", apuntó.
L'informe pon de relieve que mientres la crisis económica ente'l 2008 y el 2014 destruyéronse un total de 6,7 millones de puestos de trabayu na UE. La mayoría del empléu piérdese n'España (3,4 millones de puestos de trabayu), Italia (1,2 millones) y Grecia (1 millón), mientres que l'empléu aumentó n'Alemaña (1,8 millones) y Reinu Uníu (900.000).
"N'España, el desproporcionáu impactu (de la crisis) nel empléu -polo menos dos veces más grande que l'impactu económicu- reflexaba la importancia relativa del sector de la construcción y el mercáu llaboral altamente segmentáu del país", apunta l'estudiu.
"En contraste, la fuerte cayida del PIB n'Alemaña absorbióse per mediu una reducción del tiempu de trabayu (lo mesmo que de la productividá) en llugar de per mediu d'una reducción del empléu, sobremanera pol usu estendíu d'acuerdos pa baxar les hores trabayaes (igual que n'Austria y Bélxica)", señala la Comisión.
La comisaria d'Empléu resaltó de que la recuperación económica na UE ye "llendada y fráxil" y que'l paru, pese a baxar nel 2014, tovía ye "demasiao altu" nel 10% de media. "Hai nueva creación d'empléu, pero ye demasiao lenta", llamentó. Amás, los nuevos puestos de trabayu nun garanticen un nivel de vida abondo y el paru de llarga duración sigue aumentáu.
