La vocera d'UPyD, Rosa Díez, anunció esti xueves que va presentase a les primaries del so partíu pa ser candidata a la Presidencia del Gobiernu la tercer vez. "El 2015 ye'l nuesu añu", dixo nuna entrevista n'Antena 3 recoyida por Europa Press.

   Según dixo, la so intención ye presentase acompañada d'un equipu de xente "yá testada", como son los actuales diputaos Irene Lozano, Carlos Martínez Gorriarán o Álvaro Anchuelo, que seríen "escelentes ministros".

   "Somos un equipu, tamos preparaos pa salir a por toes", dixo la diputada, que sorrayó qu'UPyD construyó un proyectu con vocación de mayoría y ta preparáu pa gobernar España "al otru día de ganar les elecciones".

   Nesti sen, calcó en qu'UPyD "nun ye namás Rosa Díez", anque reconoció que'l so partíu tien que ayudar a que los ciudadanos lo perciban asina, y mostróse convencida de que los españoles perciben a UPyD como un partíu nuevu, porque la mocedá nun ta na edá sinón "nes idees".

   Si gana les primaries, va ser la tercer vez que Díez ye candidata a la Moncloa pol partíu que creó en dexando'l PSOE, tres les cites de 2011 y 2008. El pasáu avientu, la diputada dixo nuna entrevista con Europa Press que tovía nun decidiera si se presentaba a les primaries.