El programa estraordinariu d'activación pal empléu diseñáu pol Gobiernu y los axentes sociales pa promover la reinserción llaboral de los paraos de llarga duración (aquéllos que lleven más d'un añu nel desempléu) entra en vixencia esti xueves, 15 de xineru.
Esti programa inclúi una ayuda económica de 426 euros mensuales (80% del Iprem) mientres un máximu de seis meses, a la que van poder acceder los paraos de llarga duración qu'acabaren toles prestaciones, tengan cargues familiares y cumplan determinaos requisitos.
En concreto, pa poder solicitar esta ayuda, los paraos de llarga duración tendrán que tener un empléu anterior, buscar activamente un puestu de trabayu, y consumir les prestaciones del Prepara, Prodi o la Renta Activa d'Inserción, polo menos seis meses antes de pidir l'ayuda.
Coles mesmes, pa poder beneficiase d'esta prestación, los solicitantes tienen que tener responsabilidaes familiares y tar inscritos como demandantes d'empléu a 1 d'avientu del 2014 (tienen de siguir mientres 12 meses nos 18 meses anteriores).
L'ayuda va tener un costu d'ente 1.000 y 1.200 millones d'euros, va elevar la tasa de cobertoria de protección por desempléu ente siete y ocho puntos, hasta quedar nel 65% a mediaos del 2015, y va beneficiar a ente 400.000 y 450.000 paraos.
Los beneficiarios van tar obligaos a llevar a cabu un itinerariu diseñáu polos servicios públicos d'empléu cola idea de que se reincorporen cuanto antes al mercáu de trabayu.
Amás, va tener en cuenta la voluntá de la persona a la hora de trabayar, de manera que namás podrán beneficiase del programa los que perdieren el so últimu empléu de "forma involuntaria" y los qu'acepten "cualquier ufierta d'empléu apropiada", ente otros supuestos.
