El presidente del Gobiernu, Mariano Rajoy, va viaxar esti miércolesa Atenes pa reunise col primer ministru griegu, Antonis Samarás, que-y pidió esta cita nel entamu de la campaña electoral griega pa les llexislatives del 25 de xineru.

   Rajoy y Samarás coincidieron el domingu en París na manifestación pola llibertá y contra'l terrorismu y ellí'l primer ministru helenu propúnxo-y caltener una xunta billateral esta mesma selmana.

   La cita fixóse pa esti miércoles y nella ye previsible que se fale d'asuntos económicos y de la Unión Europea, habida cuenta de que Grecia tien pendiente un nuevu rescate financieru que podría vese condicionáu pol so contestu políticu y les elecciones del 25 de xineru.

   Samarás, del partíu Nueva Democracia sociu del PP español, figura nes encuestes per detrás de la coalición d'izquierdes Syriza que lidera Alexis Tsipras, con bien bones relaciones con Izquierda Unida y Podemos.

   Va unos díes, tres el so viaxe oficial a Andorra, el xefe del Executivu afirmó atayante que nin Grecia nin nengún otru país de la zona euru va abandonar "nunca" la moneda única y sorrayó que yá se superó lo peor. Amás, sobre un posible contaxu a España de la situación griega, respondió: "cada país tien la so propia realidá. Grecia tien la suya".