ERC anunció que va acatar les condiciones del presidente de la Generalitat, Artur Mas, pa que la candidatura d'ésti seya la única qu'axunte a independientes de cara a unes elecciones plebiscitarias.

   De toes formes, criticó que se-yos tán imponiendo "condiciones que nun son lexítimes", anunció'l secretariu xeneral axuntu d'ERC, Lluís Salvadó.

   En declaraciones a TV3 recoyíes por Europa Press, Salvadó dixo que "l'alcuerdu inminente" podría zarrase nes próximes hores, cuando l'axenda del presidente Mas lo permita.

   Salvadó argumentó que la formación ta dispuesta a ceder en beneficiu de la independencia de Catalunya y de que los comicios se celebren el primer trimestre d'esti añu.

   "Nun mos van permitir facer la candidatura que mos prestaba facer, pero si ésta ye la condición p'avanzar pola independencia de Catalunya, aceptamos", recalcó'l dirixente republicanu.

   Sorrayó qu'ERC va cumplir en marzu 84 años d'historia de llucha pa llevar a Catalunya a la independencia: "agora nun mos va venir de cuatro independientes", dixo Salvadó, qu'esplicó que la cúpula del partíu ta pendiente de l'axenda del presidente Mas.

   "L'oxetivu ye que si pue ser esti llunes que nun seya esti martes; la voluntá ye que seya lo más urxente posible porque toos tamos cansaos", indicó'l representante, que dixo que l'acuerdu zarraráse esti fin de selmana, de nun dir el presidente Mas a París.

   "Vamos asumir cualquier condición que se mos imponga, si esto ye pola independencia del nuesu país", ya indicó que na so formación tán fartos de falar de la llista y encaren con ilusión y con ganes de llevar a cabu la fueya de ruta.

   "Queríamos dir bien rápido, y Convergència nun quier dir tan rápido, pero solos nun lo vamos faer; queremos qu'haya mayoría bastante", argumentó.