Madrid (E.P.).-  La presidenta del PP de Madrid, Esperanza Aguirre, afirmó esti martes que ta a disposición del presidente del PP, Mariano Rajoy, y del partíu pa ser candidata a l'Alcaldía de Madrid.

  "Toi a disposición del partíu p'aquello que puean pensar que puea ser d'utilidá", remarcó la presidenta, tres el Comité de Dirección del PP de Madrid, onde añadió que sí treslladó personalmente esta idea a Rajoy.

   "Nun quiero faceme de rogar pa nada. Si los que tienen que decidir piensen que pueo ser un activu pal PP en cualquier de los puestos que piense que pueo ser d'utilidá, toi a la so disposición", recalcó la presidenta popular, qu'en toles encuestes suena como posible candidata a encabezar la llista del PP a l'Alcaldía de Madrid.

   Precisamente preguntada poles encuestes, afirmó que nun vio más que les que publicaron los medios pero nenguna interna. Amás, foi más allá y aseguró qu'a ella "nunca-y prestó gobernar a golpe d'encuestes". Y ye que defendió qu'hai que pensar en quién ye la persona, y nel políticu "más capaz de defender los principios y valores del partíu".

   Preguntada por si considera qu'Ignacio González ye'l meyor candidatu a encabezar la llista del PP a la Comunidá de Madrid, Aguirre afirmó que "sin nenguna duda" cree que ye'l meyor. "Por solvencia personal y política, por preparación, esperiencia y por dedicación y eficacia" cree que ye "sin duda'l meyor candidatu a la Presidencia de la Comunidá", sorrayó.

   A lo último, refirióse a les feches nes que se deberíen dar a conocer les candidatures, y caltuvo que "el momentu ye lo de menos". Eso sí, apuntó que si se quisiera nomar a persones non mui conocíes, ogiañ si nun debería retrasase l'anuncia, pero añadió que "nun paez qu'ési seya'l casu".

   El nome d'Aguirre lleva sonando con fuerza dende va meses pa encabezar la llista del PP a l'Alcaldía de la capital, pero hasta agora cuando-y preguntaron al respective siempre se remitió a los estatutos del partíu y afirmaba que'l Comité rexonal propón, pero ye'l Nacional el que dispón y el que tien que tomar la decisión pa nomar al candidatu del PP a l'Alcaldía de la capital.

   La selmana pasada'l PP de Madrid tuvo la so tradicional cena de Navidá na que coincidieron Esperanza Aguirre, como anfitriona, el presidente de la Comunidá, Ignacio González, y el mesmu Rajoy. Sentáronse na mesma mesa, con Rajoy separando a les dos cabeces visibles del PP na rexón y too fueron bones cares.

   Sicasí, díes dempués, preguntáu polos periodistes sobre posibles novedaes tres l'alcuentru n'Alcobendas, González afirmó que tres la cena too siguía igual. Nes últimes selmanes Aguirre, amás, dixera qu'ella taba "nel banquín", pa lo que pudiera pasar.