Consuelo Madrigal Martínez-Pereda, actualmente al frente de la Fiscalía de la Sala Coordinadora de Menores, sustituyirá a Eduardo Torres-Dulce al frente de la Fiscalía Xeneral del Estáu, según informa 'La Razón' na so edición en papel d'esti vienres.

   De confirmase esti nomamientu, tornaría na primer muyer qu'ocupa la máxima responsabilidá na Fiscalía Xeneral del Estáu, un cargu qu'esti xueves dexó vacante Torres-Dulce alegando "motivos personales".

   El presidente del Gobiernu, Mariano Rajoy, descartó concretar dende Bruxeles esti xueves de nueche nin el nome del nuevu fiscal nin si esti asuntu va tratase nel Conseyu de Ministros que preside'l xefe del Executivu esti vienres. Llendóse a dicir que la persona que sustituya a Torres Dulce ha ser "capaz", "independiente" y que "mire pol cumplimientu de la llei".

   Madrigal nun pertenez a nenguna asociación de xueces y cuenta con una esperiencia dilatada como fiscal. En xunu del 2013, Eduardo Torres-Dulce propúnxo-y que siguiera nel so cargu al mandu de la Fiscalía de la Sala Coordinadora de Menores mientres un nuevu periodu de cinco años. Una decisión qu'apoyó'l daquella ministru de Xusticia, Alberto Ruiz-Gallardón.

   Con anterioridá, foi fiscal destinada na Sala de lo Penal del Tribunal Supremu. Ingresó na Carrera Fiscal hai más de 30 años y fízose cargu de la Fiscalía de Menores cuando la crearon nel 2007 dientro de la reforma del Estatutu Orgánicu del Ministeriu Fiscal.

   Ún de los oxetivos de la Sala Coordinadora de Menores yera arrexuntar los protocolos d'actuación na protección de los derechos fundamentales de los menores, auniendo tamién criterios d'actuación.