La Policía Nacional detuvo esti xueves n'A Coruña a 13 miembros de los Riazor Blues, nel marcu de la segunda fase de la denominada 'Operación Neptuno', informaron a Europa Press fontes policiales. Toles detenciones fueron n'A Coruña y a toos ellos acúsaselos de participar na engarradiella del pasáu 30 de payares contra'l Frente Atlético.

   Les fontes consultaes alvierten que la operación sigue abierta polo que nun se descarten nueves detenciones. Axentes de la Brigada Provincial d'Información de Madrid desplazáronse a A Coruña pa realizar estos arrestos col apoyu de la Xefatura Superior de Policía de Galicia.

   Pa estos arrestos tuviéronse en cuenta delles imaxes analizaes polos investigadores, tanto de les cámares de seguridá de la zona de Madrid Río onde se produxo l'enfrentamientu hasta les grabaciones de testigos facilitaes a la Policía.

   Estos trece mozos deteníos súmense a los 41 arrestaos esta selmana en Madrid, Cuenca, Toledo, Ávila y Xixón. Toos ellos tán vinculaos al frente Atlético del Atléticu de Madrid y a los Ultra Boys del Sporting de Xixón. Toos ellos tán acusaos de participar na multitudinaria agarrada na que morrió un ultra de los Riazor Blues (radicales del Deportivo d'A Coruña), Francisco Javier Romero Taboada.

   Ente los arrestaos alcuéntrense los presuntos responsables de la so muerte. Trátase d'un taxista de Parla de 33 años llamáu Ismael López Pérez y un vecín d'Alcobendas de 21 años. Son los únicos a los que se-yos acusa d'un presuntu delitu d'homicidiu. Al restu acúsaselos de delitos como reña tumultuaria o tenencia ilícita d'armes.