Madrid (E.P.).-  Yá son 34 los deteníos pola Policía Nacional nel marcu de la 'operación Neptuno' contra ultres del Frente Atlético acusaos de participar na engarrada contra los Riazor Blues na que morrió'l radical del Deportivu d'A Coruña Francisco Javier Romero Taboada, de nomatu 'Jimmy', informaron a Europa Press fontes policiales.

   Ente los deteníos alcuéntrense polo menos dos persones a les que la Policía acusa de ser los autores materiales de la muerte del ultra gallegu. A eses persones detúvoseles por un presuntu delitu d'homicidiu, según les mesmes fontes.

   A la mayoría acúsaselos tamién de tenencia illegal d'armes y participación en reña tumultuaria. Esta operación ye'l resultáu de la investigación abierta pola Policía Nacional pa esclarar la muerte de 'Jimmy'. Ente otres coses, los investigadores ficieron un analís detalláu de les cámares de seguridá de la zona de Madrid Río onde tuvo llugar la engarradiella.

   Siempre según les mesmes fontes, la operación, que sigue abierta, esplegóse en distintes llocalidaes de Madrid, pero tamién hubo arrestos n'Ávila, Cuenca --concretamente nel conceyu d'Huete-- y en Talavera de la Reina (Toledo).    

   Amás de les detenciones, tán practicándose dellos rexistros relacionaos cola investigación. Yá'l mesmu día de l'agarrada detúvose a 21 persones, 16 d'elles Riazor Blues, cuatro del Frente Atlético, y una persona con antecedentes, que la Policía vincula a los Bukaneros del Rayo Vallecano y Alkor Hoolligans del Alcorcón. Toos ellos quedaron en llibertá n'emprestando declaración ante'l xuez anque imputóse-yos delitu de reña tumultuaria.

   El nome de la operación, 'Neptuno', fai referencia a la fonte de la plaza de Cánovas del Castillo de Madrid, llugar nel que l'afición del Atlético de Madrid celebra davezu los sos trunfos deportivos.