El grupu armáu Tehreek-y-Taliban Pakistan (TTP), conocíu como los talibán paquistaninos, afirmó esti xueves qu'a l'activista Malala Yusafzai galardonáronla col Premiu Nobel de la Paz por "promover la cultura occidental, non la educación".

   Nel so comunicáu, Mohamad Jurasani, voceru del grupu, aseguró que'l padre de Malala, Ziauddin, punxo a la so fía contra la relixón y la sociedá islámica y qu'invirtió dellos recursos a tal fin, según informó la cadena de televisión paquistanina Geo TV.

   Coles mesmes, dixo que tanto Ziauddin como Malala algamaron un acuerdu "coles fuerces satániques occidentales" pa destruyir Pakistán y la sociedá pashtún, antes de calcar en que'l sistema democráticu ye'l peor de tolos existentes nel mundu.

   La moza activista recibió'l miércoles n'Oslu'l Premiu Nobel de la Paz con un alegatu en defensa del derechu a la educación de los neños y en contra de los abusos que sufren los menores, especialmente'l trabayu infantil y los matrimonios concertaos.

   Afatiada con un pañuelu, Malala, que sobrevivió en resultando gravemente mancada nun ataque de los talibán cuando volvía de la escuela, manifestó'l so agradecimientu al so padre por nun corta-y "les ales" y por dexalu "volar" y a la so madre por enseñalu a "ser paciente" y a "dicir siempre la verdá", "lo que ye'l verdaderu mensaxe del islam".

   "Nun ye hora de sentir pena, ye hora de pasar a l'acción", proclamó, pa dempués calcar en qu'espera qu'ésta seya "la última vez que vemos a un neñu al que se-y niega'l derechu a la educación". Asina, aseguró que namás ye "una persona comprometida y insistente" que quier que "tolos neños reciban una educación" y que la muyer tenga los mesmos derechos "en tolos rincones del mundu".