Palma de Mallorca  (E.P.).-  L'Abogacía del Estáu, acusación particular nel casu Nóos en representación de l'Axencia Tributaria (AEAT) acusa a la infanta Cristina de "venir disfrutando" de los bienes colos que'l so home, Iñaki Urdangarin, "arriquecióse" al presuntamente defraudar a Facienda hasta un total de 337.138 euros nel 2007 y nel 2008.

   Por ello, nel escritu de calificación que presentó esti martes ante'l Xulgáu d'Instrucción númberu 3 de Palma, al que tuvo accesu Europa Press, los servicios xurídicos del Estáu reclamen que faiga frente al pagu de 168.571 euros como parte arriquecida de los efectos de los dos delitos fiscales supuestamente cometíos pol so home.

   Trataríase de la metá del dineru defraudao nes cuotes del IRPF d'Urdangarin mientres los anteriores exercicios, y que se concreten en 182.005 euros nel 2007 y 155.138 nel 2008. Según caltienen les acusaciones, Urdangarin valióse de la mercantil Aizoon, de la que ye copropietariu al 50 por cientu xunto cola infanta, como instrumentu pa llevar a cabu esta actuación delictiva.

   L'Abogacía tamién reclama una fianza de responsabilidá civil a Ana María Tejeiro, muyer del exsociu d'Urdangarin, Diego Torres, nel so casu por un total de 221.484 euros, la metá de la cuota que'l so home defraudaría nel impuestu de sociedaes nel 2007 -442.968 euros-.

   L'AEAT xustifica'l so pidimientu en que los fondos se destinaron a "servicios y suministros que repercutíen en beneficiu d'ambos miembros de la pareya", de la que, calca, "vinieron distrutando de los bienes colos qu'ambos acusaos arriqueciéronse, participando d'esta manera de los efectos de los delitos contra la Facienda Pública oxetu d'esti escritu".

   Nel casu del Duque y del so exsociu, l'Abogacía reclama trés años y mediu de cárcel pa caún de los acusaos polos supuestos delitos fiscales en qu'incurrieron, amás de facer frente a les cuotes dexaes de pagar a Facienda. L'AEAT pide d'esta manera que'l xuez José Castro abra xuiciu oral contra ambos acusaos.

   No qu'al home de la Infanta refierse, Facienda basa les sos acusaciones nes retribuciones que percibió procedentes d'entidaes privaes pola so condición de conseyeru asesor y que, sicasí, facturábense al traviés d'Aizoon como rindimientos d'actividaes económiques, coles mires de tributar menos na so declaración de la renta.

   En concreto, les empreses de les que cobró Urdangarin, que les sos retribuciones facturó al traviés d'Aizoon y que según l'AEAT tienen que considerase rentes d'Urdangarin ya integrase nel so IRPF, son Motorpress Ibérica, Aceros Bergara, Mista África, Pernod Ricard (Francia), Havas Sports France y Seeliger y Conde. A los sos responsables interrogáronlos como testigos, a lo llargo de la instrucción del casu Nóos, per parte de Castro.

   Facienda calca en que, pa defraudar, el duque utilizó un conceptu distintu na descripción de los servicios facturaos que nun taba suxetu a retención, y valióse d'Aizoon como 'tapadeera' pa cobrar les asesoríes como si se trata de rindimientos d'actividaes económiques y non de trabayu personal.

FOTO: JOSÉ RUIZ