Madrid (E.P.).-El PP fizo valir la so mayoría absoluta esti xueves nel Congresu de los Diputaos pa sacar alantre la Llei Orgánica de Seguridá Ciudadana, qu'agora va siguir la so tramitación nel Senáu.

   Los 'populares', col únicu apoyu de los sos socios electorales de UPN y Partido Aragonés, llogren asina avanzar na aprobación d'esta Llei magar les crítiques xeneralizaes de la oposición que nel alderique previu a la votación na Cámara Baxa escenificaron el so refugu frontal al testu. Tanto'l PSOE como la Izquierda Plural y otres minoríes comprometiéronse a derogala na próxima llexislatura.

   Dende la presentación del so primer borrador fai agora daqué más d'un añu, la Llei de Seguridá Ciudadana tuvo envuelta en discutiniu poles quexes surdíes ente partíos políticos y colectivos sociales, que la bautizaron como 'Llei Mordaza'. Ente los planes iniciales del Ministeriu del Interior incluyíase sancionar con hasta 600.000 euros --la multa más alta-- a los que participaren en protestes ante'l Congresu de los Diputaos sin l'autorización de la Delegación del Gobiernu.

   Sicasí, esta midida matizóse darréu nel articuláu, qu'esperimentó numberosos cambios, hasta antes de presentase como anteproyectu de Llei nel Conseyu de Ministros. Los órganos consultivos como'l Conseyu Xeneral del Poder Xudicial o'l Conseyu Fiscal tamién manifestaron les sos reticencies a delles de les cuestiones que contemplaba la Llei.

   Envióse al Congresu de los Diputaos el pasáu xunetu y nuna tramitación parlamentaria que la oposición denunció por acelerada presentáronse hasta nueve enmiendes a la totalidá --refugaes pol PP-- y 250 enmiendes parciales --de les que los 'populares' dicen asumir 80--.

   Pela so parte, ente les enmiendes introducíes a esta Llei'l PP aprovechó pa introducir una disposición transitoria que modificaba la llei d'Extranxería col fin de llegalizar la figura de la devolución en frontera d'inmigrantes de Ceuta y Melilla. Al optar per esti camín, aforró los informes de los órganos consultivos que seríen imprescindibles nel casu de que'l cambiu tuviera na redacción del proyectu de llei.