L'expresidente de Caja Madrid y de Bankia, Rodrigo Rato, aseguró que na salida a Bolsa de Bankia "nun hubo nengún tipu d'engañu", porque "les circunstancies ficiéronlo imposible".
Asina se manifestó Rato en conociéndose l'informe que los peritos del Bancu d'España enviaron al xuez Fernando Andreu, nel que se cuestiona la validez de les cuentes de la entidá del 2011 y la llimpieza del procesu de salida a Bolsa esi mesmu añu.
"En concencia, equí nun hubo nengún engañu y les circunstancies ficiéronlo imposible. Tábamos cada selmana col regulador nuna operación primero de fusión (de los siete caxes que dieron orixe a Bankia) y depués de salida a Bolsa", afirmó Rato en declaraciones a Onda Cero recoyíes por Europa Press.
Al respecto de los siguientes trámites del procesu xudicial, Rato indicó qu'agora van comparecer los peritos nel xulgáu "pa que podamos preguntar pol informe y esplicalu en detalle y nun sé si dempués va procedese a otres pruebes que les partes pidan, son más testificales o peritaxes; ye una tema que tien componentes técnicos bien intensos", señaló.
En cuanto al pagu de 6,2 millones del bancu d'inversión Lazard a Rato cuando ésti yá yera presidente de Bankia, retribución qu'investiga'l xuez Andreu, l'exdirector xerente del FMI esclaró que Lazard yera la entidá que facía d'enllaz ente Bankia y los bancos colocadores de la ufierta pública de soscripción d'acciones (OPS).
NADA QUE TAPECER NEL CONTRATU CON LAZARD
"Nun ye incompatible llegalmente nin dende nengún otru puntu de vista presidir Bankia y trabayar pa Lazard. Lo que pue querer saber el xuez, y yo nun tengo nada que tapecer, ye cuál foi la mio retribución, que taba vinculada al mio contratu, firmáu n'avientu del 2007 con un finiquitu en xineru del 2010", señaló.
"Yo pasé de Lazard a Caja Madrid. Lazard ye'l primer o segundu bancu del mundu nesti tipu d'operaciones. Yo tenia confianza nellos, conocíalos y creía que mos diben a dar un bon serviciu y creo que mos lo dieron, pero la mio remuneración con Lazard taba vinculada a un contratu del 2007, cuando nin yo nin naide pensaba que yo diba entrar en Caja Madrid y yera un contratu llegal y tresparente", añadió.
