Mieres (E.P.) .-La Fiscalía del Tribunal Superior d'Asturies entamó dilixencies d'investigación por cuenta de "delles irregularidaes denunciaes pola Coordinadora Ecoloxista d'Asturies". Según la coordinadora, les irregularidaes diéronse na execución de les obres de la Residencia del Montepío de la Minería de Felechosa.

   Según indicaron los ecoloxistes en nota prensa, la Fiscalía informólos del entamu de les investigaciones nes que la Coordinadora confía en que se compruebe si les irregularidaes "ficiéronse cola complicidá de les alministraciones".

   El colectivu ecoloxista denunciara'l desconocimientu sobre cómo se dispunxo'l terrenu y entamáronse les obres nel 2009, dao que l'espediente d'espropiación nun s'aprobaría, según la so versión, hasta mayu del 2011.

   No referío al caltenimientu del medioambiente, la coordinadora denunció que la residencia del Montepío nun tien nenguna instalación de depuración, polo que recayen tolos residuos nel colector de Felechosa. Coles mesmes, esti colector tampoco tien depuradora, faciendo que toles refugayes vayan al ríu Ayer, del que se tomen agües pal consumu humanu en Mieres.