Consuelo Vegapresenta esti llunes, 1 d'avientu, el so llibru 'Más espeso que l’agua' nel Club Prensa Asturiana, de La Nueva España, a les 20 hores.
Les narraciones que recueye Consuelo Vega nesti llibru son un actu d’atención: dedíquense a contar cachinos de vida d’unos personaxes colos que nos cruciamos a diariu, ensin qu’arreparemos muncho nellos. Les confidencies inesperaes nuna sesión de depilación, el sentimientu tráxicu de quien intenta alcontrar futuru lloñe de la tierra, la vieya alcohólica y acabada, la desesperación ente la enfermedá, el regustu duce de la infidelidá, la confianza nel futuru... son dalgunos de los temes qu’afayen sitiu nuna prosa directa y llimpia, ensin adornos, intensa y precisa.
Nestos cuentos topamos realidá n’estáu puru, distintos universos poblaos d’homes y muyeres que-y sirven a l’autora pa plasmar la tenrura y el dolor, les mancadures o la desesperanza, los sobresaltos máxicos de lo cotidiano, esi llugar dacuando amenazador. Son relatos que permanecen dientro de quien los llee, como si nun terminaren nunca.
Consuelo Vega Díaz (Bustiyé, Ayer, 1961), filóloga na alministración asturiana, ye narradora, ensayista y traductora. Tien publicáu’l llibru Cera frío (1995), col que ganó’l premiu «María Josefa Canellada» de narrativa en 1994, añu nel que participó na antoloxía Muyeres que cuenten. Primero, en 1992, preparó la edición de Cantares valdesanos de la poeta Nené Losada Rico. El so llibru Una mirada a la muyer na historia (1999) foi editáu tamién n’español. En 2002 publicó la investigación Ortografía del asturianu nos sieglos XVIII y XIX. Amás d’otros cuentos y artículos en delles revistes, traduxo del alemán al asturianu obra de Christine Nöstlinger, Peter Handke y Bertolt Brecht. Ye coautora del ensayu Del centru a la periferia (1993).
