Bruxeles (E.P.) .-La Comisión Europea volvió poner esti vienres a España -xunto con Xipre y Grecia- ente los países de la UE con más desequilibrios económicos qu'esixen una actuación "política decisiva". España supera les llendes máximes de 5 de los 11 indicadores qu'utiliza Bruxeles pa detectar riesgos económicos (unu menos que l'añu pasáu).

   Por ello, l'Executivu comunitariu va realizar una nueva revisión en fondura de la economía española nel marcu del procedimientu por desequilibrios escesivos, que va concentrase n'examinar "los riesgos relacionaos cola persistencia de los desequilibrios".

   El desequilibriu más grave de la economía española sigue siendo'l paru, con una tasa media nos últimos trés años del 24,1% (frente a la llenda del 10% considerada saludable). Bruxeles celebra que'l paru ta empezando a baxar gracies a la vuelta al crecimientu y a que "les recientes reformes nel mercáu llaboral tán empezando a dar frutos". Pero avisa de que "el nivel bien eleváu de paru xuvenil y paru de llarga duración socava les perspectives futures de crecimientu y aumenta la desigualdá social".

   L'otru gran desequilibriu ye la deuda, tanto la pública (92,1% del PIB, frente a la llaneda del 60%), como la privada (172,2% del PIB frente al 160%). La deuda pública aumentó "sustancialmente" por cuenta de la reestructuración del sistema financieru y la persistencia d'un altu nivel de déficit. Y la privada sigue siendo "bien alta", anque'l desapalancamientu siguió nel 2013.

   El restu d'indicadores nos qu'España supera la llenda de riesgu son la posición neta d'inversión internacional (-92,6% del PIB, frente a la llenda del -35%) y la perda de cuota de mercáu esportador (-7,1%, anque yá mui cerca de la llenda del -6%). "La perda acumulada de cuota de mercáu esportador, anque tovía penriba de la llenda, baxó considerablemente como resultando de les ganancies nel 2013, y la fienda relativa a otres economíes avanzaes zarróse", celebra l'informe.