Madrid (e.P.) .-El documentu de midíes económiques que va usar Podemos pa ellaborar el so programa electoral recueye la necesidá d'introducir na Constitución española un principiu que consagre'l creitu y la financiación a la economía "como un serviciu públicu esencial, obligando a que la so disposición necesariamente respuenda al interés xeneral y nun se resuelva en función del arriquecimientu de la banca privada".

   Según argumenten los economistes Vicenç Navarro y Juan Torres, autores del documentu qu'esti xueves publicó Podemos na so páxina web, ésta ye "la única forma d'evitar los problemes y costos provocaos poles socesives crisis bancaries que se produxeron n'España na etapa democrática reciente, mientres los años 70, 90 y nesta última crisis".

   "Yá ye inevitable tomar cartes nel asuntu per mediu d'una reforma en fondura del sistema bancariu", defenden los dos caderalgos nel documentu de 60 páxines tituláu 'Un proyectu económicu pa la xente', qu'ellaboraron a pidimientu de Podemos y qu'agora la formación liderada por Pablo Iglesias va someter a debate con sindicatos, empresarios y representantes de tolos sectores sociales, coles mires d'ellaborar un programa de gobiernu realista" y "pragmáticu".

"BANCOS PÚBLICOS CONTROLAOS POLOS CIUDADANOS"

   Como midida pa desarrollar el principiu d'accesu al creitu que proponen introducir na Constitución, los economistes apuesten por crear una banca pública y "bancos ciudadanos d'interés públicu". Estos bancos tendrán de tar sometíos al control ciudadanu "pa evitar la corrupción que se xeneralizó nos últimos años".

   Estos bancos tamién tendrán que cumplir "una serie de condiciones estrictes", regulaes por un "réxime de bones práctiques y d'ética bancaria" que tendrán qu'asumir tamién "les entidaes que se beneficien d'ayudes públiques o que caltienen relación comercial col sector públicu".

   Tamién señalen la necesidá de poner en claro lo primero posible "la situación patrimonial real del sector financieru y particularmente la de les entidaes que recibieron cualquier tipu d'ayuda per parte del sector públicu". "Que ye como dicir toes elles", ironicen.

   Son partidarios coles mesmes de que se meyore'l funcionamientu del Institutu de Creitu Oficial (ICO) "pa que los préstamos que recibe del Bancu Central Européu se produzan nes mesmes condiciones que la banca privada, y puea asina asegurar que la financiación llegue a les pequeñes y medianes empreses y a les families que la precisen con tanta urxencia".

   Coles mesmes, apuesten por poner en marcha nueves formes d'entemediación financiera p'arreglar les limitaciones que supón el modelu dominante de "banca global", al traviés de cooperatives financieres de cercanía, centrales de depósitos, caxes o cooperatives d'aforros y creitu vinculaes a corporaciones y colexos profesionales, universidaes, barrios y "otros grupos de población".

   "En particular, tien qu'estudiase con detenimientu la posibilidá de crear un bancu ciudadanu de depósitos col fin de separar la función de captación d'aforru de la de financiación, una forma que munchos especialistes empiecen a considerar como bien útil pa evitar los efectos negativos de l'actual práctica bancaria y qu'amás podría tener una gran utilidá pa facer más sostenible la deuda y eliminar más fácilmente los déficit públicos al abaratar la carga d'intereses", repostien.

   Per otra parte, recueyen la necesidá de baxar la carga hipotecaria de les families que "en gran parte" prodúxose, al so xuiciu, "de resultes del poder asimétricu de les entidaes financieres". "Al respecto, debería crease una institución de conciliación na que deudores, acreedores y alministración establezan condiciones pa la moratoria, reestructuración o quita de la deuda familiar en condiciones qu'aporten la mayor estabilidá posible al sistema y restituya el dañu recibíu poles families n'años anteriores", añaden.

RENTA MÍNIMA Y SALARIU MÁXIMU

   Los economistes tamién proponen la reconocencia na Constitución del Derechu a l'Alimentación "como derechu humanu universal", la necesidá d'establecer "un sistema de renta mínima garantizada como derechu suxetivu de toles persones", o la d'elevar el salariu mínimu y establecer "máximos na diferencia ente los salarios más elevaos y el salariu mediu nes empreses, que n'España ye nesti momentu de 127 a unu".

   Coles mesmes, propón contrastar les pensiones non contributives col mínimu de les pensiones contributives de xubilación y, mientres dure la crisis, aplicar un aumentu estraordinariu de les cotizaciones sociales empresariales o financiales per mediu d'impuestos.

   Tamién señalen que ye imprescindible la reconocencia de permisos por nacencia o adopción a cada proxenitor con calter intransferible, d'igual duración, y pagos al 100%. Como primer pasu hacia esti oxetivu, proponen establecer de momentu "les seis selmanes obligatories pa los padres, que ye la parte obligatoria que yá tienen les madres".

   Per otra parte, avisen que ye necesario poner en marcha una reforma fiscal que combata'l fraude fiscal, faiga efectivos los tipos impositivos pa toles modalidaes de rentes, qu'eleve la equidá xeneral del sistema y que cree nueves figures impositives pa desincentivar les operaciones especulatives ya incentivar la inversión productiva, la igualdá y la sostenibilidá de l'actividá económica".

REFORMA FISCAL

   Esta reforma tendrá qu'incluyir, al so xuiciu, la meyora del IRPF pa tornalu "nun impuestu estensivu que someta a una sola tarifa tolos tipos de rentes", la eliminación de los sistema d'estimación oxetiva de les actividaes económiques, aumentu de los sos tramos, eliminación de desgravaciones y deducciones que nun seyan d'orixe personalizao --ente otres, la desgravación por tributación conxunta de los matrimonios--, y que nun penalice a les rentes salariales, ente otres cuestiones.

   Tamién defende la recuperación de la imposición sobre'l patrimoniu y recuperar pa l'alministración central la imposición sobre la riqueza, sin perxuiciu de que les comunidaes autónomes puean modulala nos sos territorios anque evitando los pasos, la inequidá y les ineficiencias nesti momentu existentes, asina como "facer efectivos los tipos nel impuestu de sociedaes".