La cantante Isabel Pantoja ingresó esti vienres na prisión d'Alcalá de Guadaira (Sevilla) pa cumplir la pena de dos años de cárcel impuesta pola Audiencia de Málaga por un delitu de blanquéu de capitales. La tonadillera salía de Cantora a les 6 de la mañana y entró a les 7.57 hores nel centru penitenciariu.
La entrada en prisión de Pantoja produzse dempués de que la Estaya Segunda de Málaga tornara'l recursu de súplica presentáu polos lletraos de la cantante contra la decisión de nun suspender el so ingresu en prisión y dempués de que la Sala diéra-y trés díes pa empezar a cumplir la pena. La defensa tien interpuestu un recursu d'amparu ante'l Tribunal Constitucional.
Esta Sala condenó a la cantante a dos años de prisión y al pagu d'una multa de 1.147.148,96 euros, de los que pagó yá 147.000 euros. Tamién condenaron al exalcalde de Marbella y expareya de Pantoja, Julián Muñoz, y a la so so exmuyer, Maite Zaldívar, que yá cumple la pena de dos años y mediu de cárcel pol mesmu delitu de blanquéu de capitales.
Esti Tribunal refugó suspender la pena a Pantoja, planteando ente otros argumentos que, anque cumplía los requisitos pa concede-y el beneficiu de la suspensión, había que tener en cuenta circunstancies como la gravedá de la conducta y el "calter exemplar" de la pena pa que cumpla "la so función de valir de frenu a posibles conductes futures análogues".
