Madrid (E.P.) .- La Fiscalía del Tribunal Supremu solicitó l'archivu de dos demandes de paternidá del rei Juan Carlos plantegaes pol ciudadanu español Alberto Solá Jiménez y una nacional belga, según informaron a Europa Press fontes del altu tribunal.
Nel casu de Solá Jiménez la demanda de paternidá llegó al altu tribunal procedente de l'Audiencia de Madrid, qu'elevó l'asuntu al Supremu dempués de qu'a mediaos de xunetu pasáu entrara en vixencia la llei que regula l'aforamientu del monarca saliente.
El recurrente defendía que'l rei Juan Carlos caltuvo una relación cola so madre biolóxica, Anna María Bach Ramon, antes de que lu proclamaren xefe del Estáu. A Solá, nacíu en Barcelona en 1956, criólu nuna familia adoptiva.
VISTA EN SETIEMBRE
La estaya númberu 24 de l'Audiencia Provincial de Madrid tenía previsto celebrar en setiembre una vista na que diba deliberar sobre'l recursu d'apelación presentáu pol abogáu de Solá, Francesc Bueno, contra la decisión del Xulgáu d'Instrucción númberu 34 d'archivar esti casu pola inviolabilidá que la Constitución otorgaba al daquella xefe del Estáu español.
L'abogáu amplió les sos alegaciones tres l'abdicación de Juan Carlos y l'Audiencia de Madrid elevó la causa al Tribunal Supremu tres los "términos atayantes" de la llei orgánica 4/2014, del 11 de xunetu, que dispón na so disposición transitoria que los tribunales que tean conociendo de fechos relacionaos colos los nuevos aforaos tendrán que suspender la so tramitación y envialos "darréu" al altu tribunal.
L'Audiencia de Madrid acordó asina la remisión d'esti casu a "la Sala de lo Civil del Tribunal Supremu, que ye la competente pa conocer de l'acción referida", según un autu d'esti tribunal del que foi ponente'l maxistráu José Ángel Chamorro.
