Málaga (E.P.) .-La Estaya Segunda de l'Audiencia de Málaga tornó'l recursu de súplica presentáu polos lletraos de la cantante Isabel Pantoja contra la decisión de la Sala de nun suspender el so ingresu en prisión pa cumplir la pena de dos años impuesta por un delitu de blanquéu, según informaron a Europa Press fontes del casu, qu'apuntaron que se-y da un plazu de trés díes pa entrar na cárcel.

   Esta mesma Sala yá acordó'l pasáu día 3 de payares refugar dicha suspensión, manexando ente otros argumentos que, anque Pantoja cumplía los requisitos pa concede-y el beneficiu, había que tener en cuenta circunstancies como la gravedá de la conducta y el "calter exemplar" de la pena pa que cumpla "la so función de valir de frenu a posibles conductes futures análogues".

   La defensa presentó un recursu de súplica, al nun tar d'acuerdu colos argumentos del Tribunal pa refugar la suspensión y por haber un recursu d'amparu ante'l Tribunal Constitucional, amás, pidió un aplazamientu d'un mes pa dexar entamaos los sos asuntos personal y profesional. La Fiscalía Anticorrupción opúnxose a estos pidimientos y consideró que los plazos pa ingresar en prisión cumpliéronse "de sobra".

   Foi'l 24 de setiembre pasáu cuando esti mesmu Tribunal entamó la execución de la sentencia que condenó a Pantoja, al exalcalde de Marbella (Málaga) Julián Muñoz, a la so exmuyer Maite Zaldívar --que yá ingresó en prisión--; y otres cuatro persones más y dio-yos un plazu pa qu'ingresaren voluntariamente na cárcel y pagaren la multa, que nel casu de la cantante yera de 1,147 millones, de los que pagó yá 147.000 euros.

   Tres dellos trámites, la Sala refuga agora, al traviés d'un autu, el recursu de súplica y diz a Pantoja y a otros dos acusaos --Fernando de Salinas y Benjamín Martínez-- que tienen que proceder al inmediatu cumplimientu de la pena de prisión impuesta", pa lo que tendrán que presentase nel centru penitenciariu de la so elección nel plazu improrrogable de trés díes, "a contar dende la notificación del autu a la so representación procesal".

   A reglón siguíu, alviértelu a Pantoja y a los otros dos condenaos de que s'acordaría "la so inmediata busca y captura ya ingresu en prisión si nun atendieren al mentáu requerimientu nel plazu otorgáu al efectu". Fontes xudiciales esplicaron que se refier a trés díes naturales dende que se notificó la resolución dictada a los procuradores, lo que passaría esti próximu xueves, momentu nel qu'empezaría a contar el plazu.

   Dende la defensa de la cantante calcaron, en declaraciones a Europa Press, en que se caltién el recursu d'amparu presentáu ante'l Tribunal Constitucional, que tovía se tien que pronunciar sobre la so almisión a trámite o non y sobre la suspensión de la condena mientres se tramita. Coles mesmes, indicaron que va acudir voluntariamente y repitieron que nun se contempla presentar un pidimientu d'indultu.