La hestoria de la música asturiana de los ultimos cien años nun podría contase ensin la presencia de la gaita, como gran instrumentu acompañante solista, acompañante de la canción asturiana y, nos últimos tiempos, presencia viva nel rock, folk, música clasica y demás movimientos musicales modernos.

Asina, podríamos facer un repasu a los 50 últimos años de la música asturiana dende’l puntu de vista de la gaita, centrándose na presencia d’una serie de gaiteros que nos valen pa definir dafechamente esos momentos musicales.

Estos son, pues, 10 gaiteros pa 10 momentos de la música asturiana moderna:

01 José Remis Ovalle: principalmente pel so interés como solista, pero tamién por ser l’acompañante nes décades de los sesenta y primeros de los setenta de Diamantina Rodríguez y de La Pastorina.

02  Manolo Quirós: qu’averó la gaita asturiana a los soníos de la modernidá pop y qu’acompañó al grupu Nuberu, el más relevante del periodu de la Transición n’Asturies.

03 Xuacu Amieva: el primeru qu’esparde’l nuevu soníu d’una gaita afinada de Berto Velasco y que marca la so presencia en formaciones folk como Ubiña, arriendes del so propiu trabayu personal.

04  Berto Varillas: fíu del luthier Berto Velasco, qu’estrena la gaita cromática cola Orquesta Sinfónica del Principáu d’Asturies y qu’encabeza formaciones como Asturiana Mining Compay o bandines como Ástura.

05 José Ángel Hevia: que consiguió llevar la gaita asturiana electrónica, de propia creación, a les llistes d’éxitos españoles y de bien d’otros países, depués de dexar la so improta nes formaciones de bandes de gaites.

06 Flavio R. Benito: por una llarga trayectoria enllena d’actividá qu’arranca dende bien mozu, con presencia nel folk en grupos como Llan de Cubel, nel aprendizaxe de la gaita y nes bandes de gaites.

07 Diego Pangua: fíu d’ún de los grandes gaiteros de la xeneración del boom de la gaita y que sentimos detrás de formaciones folk d’éxitu como Felpeyu, ente bien d’otros trabayos personales.

08 José Manuel Tejedor: gaiteru d’enorme calidá, qu’integra xunto al so hermanu Javier, tamién excelente gaiteru, la formación folk Tejedor, otra de les referencies del panorama asturianu.

09 Santi Caleya: fíu del magníficu cantador de tonada ayerana Jaime Caleya y experimentador de la gaita al traviés de formaciones como la Bandina y formaciones de bandes de gaites.

10 Y dexo esti númberu décimu pa que rellenéis, al vuestru propiu gustu, con dalgún de los gaiteros mozos que yá bien despuntando y que de xuru va dexar amuesa d’esdti momentu presente. Xente como Llorián García, Pablo Carrera, Andrea Joglar, Álvaro Álvarez, Jesús Fernández, Rubén Alba… y tantos otros nos que tais pensando nesti momentu y que dan idea del bon momentu nel que sigue tando la gaita asturiana.