M;adrid (E.P.) .-  El Congresu va siguir facilitando los billetes a los diputaos pa los sos viaxes per España, pero según les nueves normes acordaes por PP y PSOE y aprobaes pola mayoría, van tener que llograr l'aval de la dirección del so grupu parlamentariu pa desplazamientos ayenos a la so circunscripción o casa, y si en dos selmanes nun apurren esi 'plácet', les sos señoríes van tener que devolver el dineru a la Cámara.

   Asina lo anunció'l presidente del Congresu, Jesús Posada, nuna rueda prensa na que detalló que la nueva regulación sobre los desplazamientos nacionales de los diputaos va facese al traviés d'una resolución de la Presidencia de la Cámara pa poder empezar a aplicala con efectos inmediatos, de magar la próxima selmana, una vez publicada nel Boletín Oficial de les Cortes Xenerales.

   El testu de la resolució, que cuestionaron por insuficiente  dellos grupos, establez que'l Congresu va publicar de forma trimestral na so páxina web el costu total de los viaxes que realicen les sos señoríes per territoriu nacional y que van estremase trés categoríes: los que faen de Madrid a les sos circunscripciones (o casa) y viceversa; los de calter político a otros llugares, y los institucionales.