La Fiscalía Anticorrupción en Málaga cree que trescurrió "en demasía" el plazu dau de primeres a la cantante Isabel Pantoja pa ingresar en prisión pa cumplir la pena de dos años de cárcel por un delitu de blanquéu de capitales. Por esto, opónse a que se-y conceda más tiempu. Agora, va ser l'Audiencia la que va tener que pronunciase y decidir.

   Asina se recueye nel escritu presentáu esti llunes por Anticorrupción ante la Estaya Segunda de l'Audiencia de Málaga, que s'encarga de la execución d'esta sentencia. Nel documentu, impúgnase'l recursu de súplica presentáu pola defensa de Pantoja contra la decisión de la Sala de refugar el beneficiu de la suspensión.

   La Fiscalía solicita que se ratifique la resolución dictada pola Sala, según informaron a Europa Press fontes xudiciales, a la vista de les circunstancies que yá se tuvieron en cuenta y que s'esplicaron nel so momentu nel primer informe ellaboráu contra la suspensión de la pena.

   Entós, Anticorrupción argumentó que la cantante aprovechó la so relación sentimental col exalcalde de Marbella Julián Muñoz, condenáu por esta causa tamién, "favoreciendo cola intimidá qu'aquella-y proporcionaba'l tapecimientu y opacidá de los sos actos", recordando qu'introduxo nel mercáu'l dineru que l'exrexidor llograra "ilícitamente".

   Amás, dixo que realizó dellos actos de blanquéu "respondiendo a un propósitu bien definíu y firme con despreciu absolutu, a lo menos, a los sos vecinos de Marbella, al cooperar y beneficiase de les arques públiques del Conceyu saquiaes, ente otros, pola so pareya". Coles mesmes, añadió, "nin nel xuiciu nin dempués da la más mínima muestra de reconocencia d'erru o arrepentimientu".

   Sobre la suspensión solicitada pola defensa hasta que se pronuncie'l Tribunal Constitucional, yá que se presentara un recursu d'amparu, la Fiscalía opúnxose poles mesmes razones yá espuestes nel so primer informe y añadió que "nin siquier consta la entrada a dichu tribunal de la demanda interpuesta per parte de la defensa.

   Agora, la Sala va tener que decidir sobre'l recursu de súplica presentáu y l'aplazamientu d'un mes solicitáu pola defensa de Pantoja al traviés d'un autu que va emitise nes próximes hores. Sicasí, esti Tribunal ye'l mesmu que fai un par de selmanes yá se negó a conceder a la cantante'l beneficiu de la suspensión y ordenó el cumplimientu de la pena de dos años de cárcel.