"Llamentamos anunciar que'l tercer paciente d'ébola, el doctor Martin Salia, morrió por mor de los síntomes avanzaos de la enfermedá", informó'l Centru Médicu de Nebraska na so cuenta oficial de Twitter.

   El director de la Unidá de Biocontención del hospital, Phil Smith, revela que s'emplegaron "tolos tratamientos disponibles" y que Salia recibió una dosis de plasma sanguíneo de pacientes yá recuperaos y la terapia ZMapp.

   L'hospital recuerda que Salia "taba en situación mui crítica" cuando lu ingresaron. En concreto, Smith informó de que Salia sufría graves problemes respiratorios y nos reñones. "Desgraciadamente, a pesar de tolos nuesos esfuerzos, nun pudimos salvalu", esplicó Smith.

   Salia, que tien permisu de residencia permanente n'Estaos Uníos, contaxóse d'ébola cuando trabayaba como ciruxanu nun hospital de Freetown, según informó la so familia. Yera'l xefe médicu del Hospital Kissy de la Ilesia Metodista Unida de Freetown.

   Salia foi'l tercer enfermu d'ébola tratáu na Unidá de Biocontención del Centru Médicu Nebraska, nos dos casos anteriores con éxitu. Treslladáronlu a Estaos Uníos a pidimientu de la so muyer, una ciudadana estaounidense que reside en Maryland y que se comprometió a cubrir los gastos que xenere'l treslláu y el tratamientu.