El xuez torna'l tercer grau

  El xuez de Vixilancia Penitenciaria de Valladolid devolvió al expresidente del Govern balear Jaume Matas al segundu grau, en cuenta del tercer grau que-y concediera la Secretaría Xeneral d'Instituciones Penitenciaries, tal como pudo saber Europa Press en fontes xurídiques.

   La resolución del xuez Florencio de Marcos Madruga estima asina'l recursu qu'interpunxeera la Fiscalía de Valladolid, disconforme con que Matas esfrutara yá del segundu grau penitenciariu y que suponía que dexara la cárcel de Segovia na qu'entró'l pasáu 28 de xunetu y pasara a tener como instalación penitenciaria de referencia'l Centru d'Inserción Social de dichu penal.

   El xuez tornó la concesión del tercer grau al estimar que nun hai reeducación del internu y sí riesgu de rotura de la confianza de los ciudadanos nel Estáu de Derechu.

   Según s'apunta nel autu, "anque ye un fechu indudable tanto al tiempu actual, como al de la comisión del delitu, que Jauma Matas ye un suxetu socialmente integráu -pos cuenta con un mediu sociofamiliar normalizáu, lo cual ye avezáu na delincuencia llamada de guante blancu"-, nun hai reeducación del internu y sin algamase esi fin de la pena, nun tien sen la clasificación en tercer grau".

   El xuez constata que "nun hai prueba dalguna de la existencia del arrepentimientu, asunción del fechu, conciencia del dañu causáu y del descreitu causáu a la Institución Pública. Lo único que cabe afirmar ye que l'internu fizo hasta l'últimu momentu, lexítimamente, tolo que "pudo pa nun cumplir la pena".

   Según s'indica na resolución del recursu, "nun existe un derechu fundamental a la reeducación y reinserción social" y "la reeducación y reinserción social nun ye la única finalidá de la pena privativa de llibertá. El xuez destaca que "una lexítima finalidá de la pena ye la confianza de los ciudadanos tocantes a qu'en casu d'infracción de la Llei, ésta va aplicase".

   Nesti sen, arguméntase que "el riesgu de rotura na confianza de los ciudadanos na validez del propiu Estáu de Derechu, nun pue ser resalvada polos Xueces. Atender a la prevención xeneral como parámetru a considerar nun casu de corrupción política ye perfectamente lexítimu, anque la pena seya de corta duración, polo cual han ser poderoses razones d'otra índole les que lleven a primar los intereses particulares del internu, sobre los xenerales de la sociedá".