Jorge Tuya (Seloriu, Villaviciosa, 1958) ye la voz masculina que meyor representa’l tránsitu del sieglu XX al XXI na tonada asturiana. Entama a cantar a los 19 años presentándose nel Concursu de Canción Asturiana de Mercaplana de Xixón, nel qu’algama’l quintu puestu.
Nesti tiempu conoz a Javier d’Arroes, la persona que más lu motivó a siguir cantando, a ampliar el repertoriu y a participar nos principales concursos d’Asturies. Cásique cuarenta años depués, sigue interviniendo en concursos, de forma más distanciada, y ganando como na presente edición 2014 los del Cuenca del Caudal y el Ciudá d’Uviéu.
Tien grabaes una llarga riestra de tonaes asturianes, con too y que tovía los entendíos-y siguen pidiendo que grabe ún personal que recueya’l frutu d’esti gran momentu de voz nel que s’afaya. Asina, tien bien del so repertoriu desperdigáu por estremaes grabaciones, como tamién xunto a formaciones como’l Dúo Astur, el grupu Boides o el cuartetu Los 4 Ases de la Toná.
Pero, válenme estes 10 tonaes pa facer una pequeña antoloxía de la so amplia obra grabada. Un resumen que recueye la grandeza de la so voz, l’amplitú del so repertoriu y, más que nada, la belleza de les sos interpretaciones, que van sirvir de referencia bien d’años pa les nueves xeneraciones.
Estes son 10 clásiques del so repertoriu:
01 “La portillera”, en youtube https://www.youtube.com/watch?v=DfKVxMl3pos, del programa “Pieces” de TPA.
02 “La mio neña” , en youtube https://www.youtube.com/results?search_sort=video_view_count&search_query=jorge+tuya, del programa “Sones” de TPA.
03 “A la salida del Sella”, en youtube https://www.youtube.com/watch?v=KA87rPjQq5I, del programa “Sones” de TPA.
04 “Manzanes neña”, nel CD Cantares de Sidra y Chigre.
05 “Carretera d’Avilés”, del CD Asturies: camín de Compostela, de Boides.
06 “Tengo de dir al molín”, nel CD 25 clásiques de l’asturianada.
07 “Soi pastor”, nel CD 25 clásiques de l’asturianada.
08 “Xunci les vaques, Ramona”, xunto a Luis Estrada, nel Duo Astur.
09 “De la raíz del manzanu”, del CD Cuatro Ases de la Toná.
10 “Nun puedo subir al puertu”, del CD Cuatro Ases de la Toná.
Jorgeb Tuya Riva, como tolos grandes cantadores del xéneru, cuenta con un repertoriu ta increible como pa poder escoyer otres 10 canciones y ser tan magnífiques como les presentes.
