El voceru d'Izquierda Unida na Xunta Xeneral, Aurelio Martín, criticó esti vienres el posible pactu presupuestariu ente PP y PSOE de cara a aprobar les cuentes del Principáu nel 2015. Trátase, na so opinión, de "daqué más", d'un acuerdu políticu "p'agora y pal futuru".

   En declaraciones a los medios mientres la sesión plenaria na Xunta, aseguró que detrás del pactu "hai una estratexa bipartidista" que busca, nuna situación "bien complexa y complicada", de gastadura del bipartidismu "intentar resistir esta marea ciudadana en contra".

   Asina esplicó que "agora entiende" por qué les propuestes que'l so grupu parlamentariu realizaba mientres les negociaciones presupuestaries a la conseyera de Facienda, Dolores Carcedo, nun podíen realizase.

   Pela so parte, el diputáu d'UPyD, Ignacio Prendes, dio por fechu que'l Gobiernu autonómicu socialista yá contaba col preste del PP a los presupuestos y por esti motivu "nun se quiso facer nin el más mínimu esfuerzu". "Creo que se confirma que nun teníen necesidá de buscar apoyos porque yá contaba con apoyos bastantes", manifestó, n'alusión a los 'populares'.

   En declaraciones a los medios mientres el plenu de la Xunta, Prendes criticó que "nun hubo una negociación real con UPyD". "Nun recibimos nin una contraoferta ante lo que nos paecíen propuestes sensates nueses", añadió, n'alusión a les sos iniciatives sobre inversión real granible, rebaxa fiscal efectiva y polítiques de 0 a 3, o l'amenorgamientu del sector públicu.

   Pal líder de la formación n'Asturies, nun se trata d'un fechu aislláu. PP y PSOE, a la so manera de ver, caltuvieron "un acuerdu a lo llargo del últimu añu nes cuestiones fundamentales que s'aldericaron nesta cámara". "Nun creemos en teoríes 'conspiranoiques', namás sacamos conclusiones de los fechos y cada vez que'l gobiernu precisó apoyu pa sacar alantre dalguna llei, proyectu de llei o política, alcontró l'apoyu del PP, "a cuenta d'ellos sabrán qué", señala'l voceru parlamentariu d'UPyD.