El fiscal xeneral del Estáu, Eduardo Torres Dulce, va dexar al criteriu de los fiscales de Cataluña la decisión d'interponer o non una querella contra'l presidente de la Generalitat, Artur Mas, y dellos conseyeros pola organización del procesu participativu sobre la independencia del 9 de payares.

   Asina s'espeya nel conteníu de la xunta que Torres Dulce caltuvo esti miércoles na sede de la Fiscalía Xeneral col fiscal superior de Cataluña, José María Romero de Tejada, y el so númberu dos, Francisco Bañeres, que s'enllargó mientres una hora y media.

   Al términu de la xunta, la Fiscalía emitió un comunicáu nel que señala que "la Fiscalía Superior de Cataluña va dar cuenta al fiscal xeneral del Estáu de la decisión qu'adopte nel marcu de los principios de llegalidá ya imparcialidá que rixen l'actuación del Ministeriu Públicu",

   Nel mesmu comunicáu precísase que la xunta consistió na valoración xurídicu-penal de los fechos asocedíos nel llamáu "procesu de participación".

   Amás de los dos fiscales de Cataluña yá mentaos, na xunta tuvo presente tamién el xefe de la secretaría Técnica, Jaime Moreno, qu'asistió pa concretar los aspectos técnicos de l'acción penal que ta estudiándo presentase contra'l presidente de la Generalitat.

   Ente les sos dilixencies, la Fiscalía envió esti fin de selmana un oficiu urxente al director xeneral de los Mossos d'Esquadra pa saber la relación de llocales nos que se celebró y quién yeren los responsables de los mesmos, y tamién pidió a la Conseyería d'Enseñanza información de si'l Govern ordenara poner a disposición del 9P los centros educativos.

   Los fiscales tuvieron a la so disposición mientres la xunta d'esta tarde les comunicaciones enviaes polos Mossos d'Esquadra a la Fiscalía de Cataluña sobre les que se ta realizando un analís técnicu pa estudiar si d'elles podría derivase la interposición de la querella.

   L'anunciu de presentación de la querella realizáu ayeri nuna televisión pola líder del PP en Cataluña, Alicia Sánchez-Camacho, qu'a lo último nun se produxo, provocó que dende distintos sectores se fale de presiones a la Fiscalía, que s'atoparía acabando la presentación d'esta acción penal contra Mas y parte del so Gobiernu, de magar les dilixencies abiertes la viéspora de la denominada consulta alternativa.