2015 ta a la vuelta l’esquinal y paga la pena, agora que tovía se ta a tiempu, recordar una serie d’eventos que nun tendríen de pasar desapercibíos y que bien podríen conmemorase.

De xuru que tien d’haber enforma más. pero esti ye un repasu rápidu a 12 fundamentales pa recordar nesti añu entrante, 2015:

01 (1990) Cúmplense 25 años de la creación pol luthier gaiteru Alberto Fernández Velasco de la primer gaita asturiana cromática, que va estrenase tres años depués en conciertu cola Orquesta Sinfónica del Principáu d’Asturies.

02 (1990) Cúmplense 25 años de la creación de l’Asociación d’Intérpretes de Canción Asturiana (AICA).

03 (1990) Cúmplense 25 años de la creación del Conceyu de Gaiteros Asturianos, nel que tuvieron presentes los cabezaleros de la xeneración moza d’entós: Xuacu Amieva, Pedro Pangua, Berto Varillas, Vicente Prado “El Pravianu”, Hevia…

04 (1990) Cúmplense 25 años de la muerte del poeta Llorienzu Novo Mier, lletrista de tonaes asturianes como “Coyí d’un artu una flor”, fundador de l’Asociación Amigos del Bable y miembru de l’Academia de la Llingua Asturiana.

05 (1965) Cúmplense 50 años del triunfu del cantador de tonada Gerardo Orviz nel programa de TVE Salto a la fama, lo que-y da una enorme visibilidá a nivel español a la tonada asturiana.

06 (1965) Cúmplense 50 años de la edición del discu recopilatoriu Lo mejor de Asturias, el de más grande númberu de ventes na década.

07 (1940) Cúmplense 75 años de la estrena de la película Marianela, de Benito Perojo, rodada en partes nes mines de Figareo de Mieres, y qu’incorpora tonaes asturianes nes voces de Juanín de Mieres y José Crespo Bobes, “Gasparina”.

08 (1915) Cúmplense 100 años de la edición de la partitura de la canción “Paloma blanca”, del xixonés Juan Martínez Abades, más conocida pol títulu “Soi asturianín”, col que la popularizó Cuchichi.

09 (1915) Cúmplense 100 años del nacimientu del cantador de tonada José Requejo, en Morea de Riba, conceyu d’Ayer.

10 (1915) Cúmplense 100 años del nacimientu del folclorista Antonio Cea Gutiérrez, que xunto al Cuartetu Cea dexó grabaos los discos Ritos al agua, al árbol y al fuego, La Misa de Gaita y La Canción del Mar.

10 (1890) Cúmplense 125 años de la publicación del llibru 100 cantos populares asturianos, del compositor José Hurtado, nel qu’aparecen versiones de “Soi de Pravia”, “A la mar vanse los ríos”, “D’ónde son los carboneros”, “Cai la del Rivero”, “Soi de Mieres” o “Fuime a cortexar a Faro”.

11 (1890) Cúmplense 125 años del nacimientu de José Menéndez Carreño, Cuchichi, nel barriu de Pumarín d’Uviéu, miembru del cuartetu de Los Cuatro Ases de la Canción Asturiana.