El presidente del Gobiernu d'Estremadura, José Antonio Monago, aseveró en relación a les informaciones sobre los sos viaxes a Canaries cuando yera senador: "cuando fice un viaxe priváu paguélu yo, y puedo acreditalo documentalmente", y insistió en que na so xera como senador realizaba viaxes per toa España.

   En rueda de prensa en Mérida, el presidente estremeñu quiso salir al pasu de les informaciones publicaes esti xueves y vienres, sobre les que llamentó "l'espectáculu" que se dio "per parte de dalgunos, que foi bochornosu".

   "A mi yá m'avisaron qu'esto diba pasar, yá tenía conocencia va dalgún tiempu", polo que "lo taba esperando", recalcó José Antonio Monago, que consideró qu'esto "asocedió por querer cambiar les coses", y alvirtió: "nun puen parame, nin van callame, y a cada golpe que me dean voi ser más fuerte, y voi ser más contundente na respuesta".

   Nesi sen, anunció que va poner "en manes de la xusticia" pronto "tolos comentarios, toes este calumnies", sobre les que va nomar representación lletrada pa que defendan el so honor.

   Asina, anunció que va emplegar "tolos instrumentos" del derechu "pa llegar hasta'l final" y que les persones que lu "calumniaron" a él mesmu o a la so familia "respuendan por ello ante la xusticia".

   Al respective de les informaciones qu'aluden a la so vida privada, señaló que nun va entrar porque nunca entró, dao qu'anque seya políticu tien "derechu al honor y a la intimidá", resaltó.