“Al pasar per el puertu” ye la tonada númberu ún del repertoriu asturianu. Comprobámoslo cuando ficimos recopilación de les interpretaes a lo llargo de 5 años de duración del programa Sones en Tpa nel que s’interpretaron alredor de 5000 tonaes.

Grabase pela primer vez en 1929. Canta Obdulia Álvarez, La Busdonga, y acompaña al piano Baldomero Fernández. Y, a lo llargo de noventa años, podría dicise que nun existe cantadora de tonada que nun la interpretara y que, inda agora, la siga teniendo nel so repertoriu y llevándola a les finales de los principales concursos de canción asturiana.

Asina, d’ente toles versiones grabaes, les 10 siguientes puen sirvir pa dar una visión de les inmenses posibilidaes d’una asturianada 10:

01 (1929) Obdulia Álvarez, La Busdonga. Grabación en pizarra, de la qu’existen bien de reediciones. Al piano, Baldomero Fernández.

02 (1958) Dúo Los Covandonga (Berta y José Luis), “Canciones de Asturias”. Editáu en Venezuela pola discográfica Canario.

03 (1969) Diamantina Rodríguez, “Gaita y voz en el triunfo de Asturias”. A la gaita, José Remis Ovalle.

04 (1990) Marcelina Cuesta, La Nachón, “Tonada”.

05 (2000) Mariluz Cristóbal Caunedo, “Onde la ñublina posa”.

06 (2001) Anabel Santiago, “Tierra de sueños”.

07 (2001) Diego Pangua, “Ente’l cairón”. Versión musical.

08 (2004) Liliana Castañón, “Nel café de la esquina”. Al piano, Xaime Arias.

09 (2004) Rosario González, “De L.laciana vengo”. Al piano, Xaime Arias.

10 (2012) Marisa Valle Roso, “De lo fondero l’alma”. Al piano, Xaime Arias.

De xuru qu’existen bien d’elles más, pero estes 10 versiones de “Al pasar per el puertu” puen sirvir de bona referencia.