Joaquín Pixán y Antonio Gamoneda vienen falando na prensa de la necesaria renovación de les lletres de les canciones asturianes. Suena un poco presuntuoso pola forma na que lo dicen y por dalguna de les propuestes que faen, como cambia-y la lletra al “Asturies, patria querida” o a la impresionante “Arrimadín a aquel roble”. Pero, en realidá, ye dalgo que se vien faciendo de manera natural a lo llargo de tol sieglu XIX y XX –tiempu del que tenemos meyor conocimientu.

Estos son 10 exemplos de poetes, dende Teodoro Cuesta a Xuan Bello, que cuenten con versos suyos formando parte del cancioneru popular.

01 Un poeta como Teodoro Cuesta compón “Ayer me dixo to madre”, a petición d’Anselmo González del Valle, pa que’l tenor Enriko Tamberlik la estrene na clausura de la temporada d’ópera d’Uviéu, el 2 de xunu de 1882.

02 Un poeta y músicu como’l xixonés Amalio López compón en 1925 “A la Pipiona” pa que la estrenara en Xixón el tenor Miguel Fleta. Inmediatamente grabáronla Ángel González, El Maragatu, y Juan Menéndez, Juanín de Mieres.

03 Un poeta y músicu como Baldomero Fernández compón “Al pasar per el puertu” que, tras grabala en 1929 Obdulia Álvarez, La Busdonga, conviértese na canción asturiana más interpretada por voces fememines a lo llargo de tol sieglu XX.

04 Un poeta como José Manuel García González, que firmaba como Marcos de Torniello, compón “Gozoniega” sobre la cadencia d’una habanera cubana de primeros de sieglu XX. Tovía la siguimos cantando cola so lletra: “Soi de Verdiciu / nacía a la vera / del Cabu Peñes / xunta la mar…”

05 Un poeta como José León Delestal compón en 1975, “La mina y el mar”, pal primer discu del tenor asturianu Joaquín Pixán.

06 Un poeta como Manuel Asur compón bien de lletres pal grupu Nuberu y ún d’ellos, “Dame tira”, conviértese nel cantar que meyor reflexa los años de la Transición n’Asturies.

07 Un poeta y cantautor como Carlos Rubiera convierte una habanera tradicional recoyida nel Cancioneru d’Eduardo Martínez Torner, nuna de les pieces más populares de finales de sieglu XX: “La capitana”.

08 Una poeta, recientemente fallecida, como Nené Losada, compuso unes cuartetes tan hermoses que se convirtieron en populares al adaptase al ritmu de vaqueirada. La cantadora Liliana Castañón incorporó bien d’elles nel so discu “Nel café de la esquina”, de primeros d’esti sieglu XXI.

09 Los hermanos Valle Roso, dos de les voces más xóvenes del panorama asturianu actual, interpreten a dos voces el poema de Berta Piñán “Tópicos”, convirtiéndolu en toa una referencia de la moderna canción asturiana a dos voces.

10 D’un poeta como Xuan Bello ye la lletra del “Poema inacabáu” que cierra’l discu “Desnuda” de la cantadora Anabel Santiago. La crítica musical consideró qu’esti yera’l meyor exemplu de tonada del sieglu XXI.

Son namás 10 exemplos. Hai munchos más: poetes que convirtieron en populares los sos versos gracies a una bona melodía o una bona interpretación. Tantos o más exemplo de poetes que tan detrás d’otres obres que nun tuvieron el mesmu nivel d’aceptación popular.

El futuru de la canción asturiana nun se cronstruye cambiándo-y la lletra al “Asturies, patria querida” y a “Arrimadín a aquel roble”, sinon componiendo los “Asturies, patria querida” y los “Arrimadín a aquel roble” del futuru.

FOTO: Amor Muñiz