La manera d’afrontar la muerte y de relacionase con ella al traviés de los ritos funerarios, cambia d’una cultura a otra. Les canciones que falen de la muerte, nel casu d’Asturies, apurren pistes bien valioses sobre’l conceptu de la muerte pa los asturianos.

1 La muerte como idea poética, como na tonada que diz: “Nel mar críense los peces / na oriella los caracoles / y nel cementeriu Llastres / mariselves y amapoles”.

2 Como tamién nesta tonada soberana: “Toos nesti mundu / tenemos toos nesti mundu / dalgo polo que llorar / lo que llorar / unos polo que tuvimos / otros polo que tendrán”.

3 La dureza de la muerte nel trabayu de la mina, cantada col desgarru que tienen bien de tonaes mineres: “Tengo un hermanu mineru / qu’echa sangre pela boca / y nos brazos de mio madre / derramó la última gota”.

4 Como tamién cuartetes con ciertu conteníu filosóficu: “Nel cementeriu Santana / pon un lletreru bien grande: / tu podrás nun tener priesa / yo nun m’olvido de nadie”.

5 Un conteníu filosóficu que se convierte en sarcásticu notru modelu de cuarteta: “Nun tengo prisa en morrer / dixo’l moribundu al cura / quiero antes azulexar / la paré la sepultura”.

6 O directamente irreverente: “Nun árbol del cementeriu / tayó un cola navaya / ¡allevantáivos, so vagos / la tierra pal que trabaya!”.

7 Como tamién ye’l casu d’esta otra cuarteta, que forma parte de la llarga serie burllesca que tienen como obxetu los cures: “ Mándenme cantar a voces / a voces que cante’l cura / cuando va echar los responsos / al lláu de la sepultura”.

8 Cuartetes que ruempen de dalguna manera coles más tradicionales, que cantaben a les ánimes del purgatoriu. Anque se trata d’un tipu que quedó relegáu al folclor infantil, de manera que los neños asonsañaben con él les penitencies de les vieyes: “Ánimes del purgatoriu / ¿cuála ye la vuestra pena? / El nun haber dío en vida / a Santiagu Compostela. / ¡Ai, ai, ai, qu’equí m’abraso / ai, ai, ai, qu’equí me quemo! / ¡Ai, ai, ai, Señor Benditu / llíbranos de los infiernos!”.

9 Como estos otros versos que s’entonaben al pasu del viáticu: “Pela cai va’l Señor / vistíu de carne humana / a visitar a un enfermu / que ta postráu na cama: / ¡Dios-y dé salú y vida / y salvación pal so ánima!”.

10 Lo que nun quita pa que, tamién dende la tradición, lleguen otros versos qu’afronten la muerte dende una perspectiva mui terrenal: “Mio madre morrió de mal / mio padre morrió de vieyu / y un hermanu que tenía / morriera del mal postreru: / y yo que yera’l más ruín / quedé con too d’herederu”-