L'Institutu de Creitu Oficial (ICO) concedió financiación n'Asturies por importe de 396 millones d'euros hasta'l 30 de setiembre del 2014, lo que supón una subida del 78 por cientu al respecto de los 222 millones del mesmu períodu del 2013.
Según indicó l'institutu en nota prensa, al traviés de les Llinies ICO financiáronse un total de 4.926 operaciones, tanto d'inversión como de liquidez. La llinia más demandada foi la d'Empreses y Entamadores, destinada a financiar nuevos proyectos d'inversión y necesidaes de liquidez n'España. Al traviés d'esta llinia concediéronse 4.488 préstamos por importe de 305,39 millones d'euros.
Coles mesmes, l'9ICO punxo en valor los 84,5 millones destinaos a financiar 414 operaciones d'esportación al cortu plazu. Esta cifra "multiplica por más d'ocho veces" el volume de préstamu concedíu nel 2013, lo que pon de manifiestu "la creciente actividá internacional de les empreses asturianes".
En cuanto al tipu d'empreses que se beneficiaron de los préstamos ICO, el 71 por cientu de les operaciones de préstamu concediéronse a micropymes d'unu a nueve emplegaos y el 20 por cientu a empreses de diez a 49 emplegaos.
No que se refier al importe de los préstamos concedíos, un 52 por cientu son operaciones d'hasta 25.000 euros y un 27 por cientu de les operaciones son de 25.000 a 75.000 euros.
Nel alcuentru entamáu esti miércoles n'Uviéu pol ICO y l'ICEX sobre 'Apoyos d'ICO a la Internacionalización Empresarial', los representantes del ICO presentaron el Catálogu de Productos internacional desarrolláu pol institutu pa promover la salida al esterior de les empreses españoles, y los datos globales de les distintes llinies de financiación.
