La organización --Oxfam Intermón n'España-- analiza nel so informe 'Iguales: Acabemos cola desigualdá estrema. Ye hora de cambiar les regles' la situación de más de 50 países. Pa la ONG, la crisis amenaza con llevar la llucha contra la probeza a niveles de va décades y con xenerar niveles de desigualdá inéditos.

   El pesu de los mercaos financieros y la ellaboración de lleis per parte de les élites afalaron estes disparidaes, según Oxfam, que cita como exemplu de desigualdá l'aumentu d'un 14 por cientu na suma de les fortunes de les 85 persones más riques del mundu.

   Les fortunes d'estes persones aumentaron cada día unos 668 millones de dólares, lo que supón casi mediu millón por minutu, y el dineru que tien equival al de la metá más probe del mundu, según los datos d'Oxfam. N'África, 16 'milmillonarios' conviven con 358 millones de persones n'estrema probeza.

   La ONG entamó una nueva campaña que, baxo'l nome de 'Iguales', pretende concenciar a los líderes internacionales pa que dean un tratu xustu a la población probe, con fechos y non solo con palabres. Proponen un impuestu del 1,5 por cientu sobre la riqueza de los multimillonarios que permitiría recaudar fondos pa garantizar la educación de la infancia a nivel mundial y la provisión de los servicios sanitarios básicos.

   Coles mesmes, Oxfam considera necesario adoptar midíes pa frenar la evasión fiscal per parte de grandes empreses y persones adineraes, de forma tala que contribuyan d'una forma xusta a les sos respectives sociedaes.