El xuez de l'Audiencia Nacional Santiago Pedraz ordenó los rexistros en viviendes y oficines rellacionaes con Oleguer Pujol, fíu menor del expresidente de la Generali Jordi Pujol, p'alcontrar el dineru que presuntamente pudo blanquiar xunto col so sociu Luis Iglesias al traviés de siete operaciones inmobiliaries, informaron fontes xurídiques.

   Pedraz pretende esclarar l'orixe del dineru col que s'alquirieron 1.152 oficines del Bancu Santander per parte de la sociedá Samos Servicios y Xestiones, la compra d'edificios de Bankia per parte de les sociedaes Step Negocios y Ursus Alfa, la d'un hotel en Canaries y operaciones realizaes ente la sociedá inversora Longshore y Prisa Division Inmobiliaria.

   Tamién s'alcuentren ente les transacciones investigaes les realizaes ente Nueva Melilla Asociaos y Trés Forcas Capital, asina como la compra d'inmuebles en Palma de Mallorca y l'alquisición del edificiu del Conseyu Xeneral de l'Abogacía por Step Negocios nel 2012.

   El titular del Xulgáu Central d'Instrucción númbeeru 1 de l'Audiencia Nacional investiga a ambos pola comisión de delitos de blanquéu de capitales y contra la Facienda Pública. Esplora si, per mediu de soscripciones y aportaciones de capital y préstamos llevaos a cabu ente sociedaes residentes y non residentes, colocáronse n'España fondos procedentes del esterior, concretaron les mesmes fontes.

   La investigación detectó que les sociedaes inversores, propiedá d'empreses non residentes nel nuesu país, realizaron ampliaciones de capital y otres aportaciones de dineru sin qu'existan nicios de que contaren con financiación abondo pa ello. Tamién s'alcontraron hipoteques como garantíes de préstamos otorgaos a persones xurídiques que nun paecen ser titulares de los bienes que valen como garantía.