Llanes (E.P.) .-Más de 5.000 persones firmaron dende agostu en contra de la construcción d'un aparcamientu na playa de Gulpiyuri (Llanes).  L'alministrador del blogue 'AsturiasVerde.net', Antonio Dosantos, foi'l promotor de la iniciativa, qu'algamó la cifra de 5.000 firmes, un númberu "bien representativu" como pa tresmitir un escritu al presidente d'Asturies, Javier Fernández, en contra de la construcción.

   En declaraciones a Europa Press, Dosantos esplicó que 5.000 ye una "cifra sensible" pa llamar l'atención sobre la problemática, que se remonta al mes d'agostu, cuando dellos turistes demandaron un aparcamientu na playa. Eso supondría, según los firmantes, un "gran impactu ambiental" y "desvirtuaría" la singularidá de Gulpiyuri.

   Ante'l pidimientu popular del aparcamientu, Dosantos destacó la necesidá de facer un "contra pidimientu popular" qu'evitara la construcción del mesmu. Esti miércoles zarrará la recoyida de firmes --qu'hasta'l momentu axuntó 5.010-- pa dempués preparar la carta que va enviase lo mesmo a los grupos políticos representaos na Xunta Xeneral como al presidente asturianu.

   Sobre la efectividá de la iniciativa, el so promotor mostróse confiáu en que van atender a les sos demandes. "Nun sé cómo va solucionase, pero van facemos casu porque tamién los espertos defenden que nun se construya l'aparcamientu", esplicó. Asina, plantegó que pue habilitase un aparcamientu nel pueblu o meyorar el senderu d'accesu a la playa como midíes alternatives.