El presidente de la Comunidá Valenciana, Alberto Fabra, considera qu'hai qu'espulsar del Partíu Popular al expresidente de Bankia, Rodrigo Rato, pol presuntu usu fraudulentu de les 'tarxetes B', dao que, según dixo, "nun caben eses conductes nestos momentos ante los ciudadanos".

   Asina se pronunció a la so llegada al Comité Executivu del PP que preside'l xefe del Executivu, Mariano Rajoy, a preguntes sobre si'l partíu tendría qu'echar a Rato del partíu, dempués de que'l xuez atribuyéra-y un delitu d'alministración deslleal ya impunxéra-y una fianza de trés millones pol usu de les tarxetes.

   "Creo que nun caben eses conductes ante los ciudadanos. Nun caben nestos momentos de rocea y de distanciamientu ente los ciudadanos y los políticos. Hai que ser mui contundente", declaró Fabra, que "cree" que l'exvicepresidente del Gobiernu mientres ocho año tien d'abandonar el PP.

   A preguntes dempués si va solicitar güei mesmo a Mariano Rajoy mientres  la xunta del Comité Executivu del PP, Fabra señaló que nel partíu saben "perfectamente" lo que tienen que facer ante esti casu.

EL COMITÉ DE DERECHOS TRAMITA L'ESPEDIENTE

    El PP anunció'l pasáu 7 d'ochobre l'abertura d'un espediente informativu a Rato pol casu de les 'tarxetes black', xusto un día primero qu'al que fuera vicepresidente del Gobiernu con José María Aznar mientres dos llexislatures lu citaren pa declarar como imputáu ante'l xuez Fernando Andreu, qu'esti pasáu xueves atribuyó-y un delitu d'alministración deslleal ya impúnxo-y una fianza de trés millones d'euros.

    El Comité de Derechos y Garantíes del PP empezó a tramitar esi espediente, pero nun tomó nenguna midida cautelar como la suspensión temporal de militancia alegando qu'antes de cualquier decisión tienen qu'escuchar les esplicaciones de Rato. La mesma secretaria xeneral del PP, María Dolores de Cospedal, aseguró va unos díes que ye de "xusticia" oyer la versión del expresidente de Bankia.

    Pela so parte, Rajoy nun se quiso pronunciar sobre si Rato tien que siguir o non nel PP sorrayando qu'esi espediente ta abiertu y qu'él nun tenía de "prexulgar nada". Eso sí, evitó nomalu y aludió al él como "la persona pola qu'usté s'interesó".