Ismael González Arias.- En 1889 nacía n’Uviéu Ángel González Rodríguez, “El Maragatu”, que diba ser conocíu col tiempu’l primer de los clásicos de la tonada asturiana. Un grupu integráu por 10 voces que nacieran nel intérvalu de tiempu de doce años y que, del más grande al más pequeñu, fueron: El Maragatu, Cuchichi, Botón, Claverol, Quin el Pescador, Santos Bandera, La Busdonga, Miranda, El Polenchu y Xuacu’l de Sama. Diez voces que reúnen en xunto la más grande parte del repertoriu clásicu de la tonada asturiana.

Diez voces que durdieron tres de la estela d’éxitos llograos a finales de sieglu XIX pol Gaiteru Lliberdón. Cantadores qu’empezaron a dase a conocer en diferentes actuaciones y, posteriormente, nos concursos de tonada qu’entamaron organizase. Y que, más que nada, entraron na lleenda de la canción asturiana de primeros de sieglu XX por mor del surdimientu de los medios de grabación y de la radio. Pero, tamién –dao que dellos nun dexaron grabao nada-, gracies a que la tresmisión oral fizo de les sos interpretaciones un modelu a siguir.

Nestos 125 condénsase la hestoria moderna de la canción asturiana y esyos 10 nomes son imprescindbles pa entendela y valorala:

1889 agostu 26. Ángel González Rodríguez, “El Maragatu”, ñaz en Nubleo, Corvera d’Asturies. Dende bien mozu entró en contactu col compositor Baldomero Fernández. Pa ca´sique tolos miembros de la so xedneración y posteriores fue siempre un verdaderu maestru.

1890 agostu 12. José Menéndez Carreño, “Cuchichi”, ñaz n’Uviéu. Entro a los 15 años nel Orfeón Ovetense y fue amigu y trabayó con Baldomero Fernández y Torner. La so primer grabación ye de 1918 y tovía a la edá de 81 años dexó grabaes 18 tonaes nel so últimu discu. Formó parte de Los Cuatro Ases.

1892 xunetu 19. José Martínez Suárez, “Botón”, ñaz n’Uviéu. Cola so muerte, Los Cuatro Ases desapareció, ya que los sos compañeros decidieron que faltando él nun siguiríen cola formación. Enantes d’esta formación de cuartetu, fizo dúu con Cuchichi y tuevieron xuntos de xira per América.

1892 ochobre 29. Enrique Claverol Estrada, “Claverol”, ñan n’Uviéu y tamién formó parte del cuartetu Los Cuatro Ases y formóse como ellos nel Orfeón Ovetense.

1893 ochobre 17. Enrique Cienfuegos Martínez, “Quin el Pescador”, ñaz n’Uviéu. Quedó en segundu llugar nel primer concursu de canción asturiana del que se tien noticia, l’entamáu por Baldomero Fernández, Eduardo Martínez Torner y Juan Uría Ríu na plaza toros d’Uviéu.

1895 xineru 9. Santos Luciano Alonso Castañón, “Santos Bandera”, ñaz en Casquellu, Felechosa, altu Ayer. Nun dexó grabada nenguna ayerana, pero la memoria de les sos interpretaciones perdura ente los siguidores del xéneru.

1896. Obdulia Álvarez Díaz, “La Busdonga”, ñacida n’Uviéu, pasó la so infancia y mocedá en Mieres onde los padres rexenhtaben una sidrería na plaza Requexu. Les sos grabaciones siguen siendo un modelu pa les voces de muyer. Tamién fue discípula de Baldomero Fernández.

1897 xunetu 3. Vicente Miranda Rodríguez, “Miranda”, ñaz n’Uviéu. Ganó’l primer concursu de canción asturiana, de 1922, na plaza toros d’Uviéu. Formó parte de Los Cuatro Ases y la so voz quedó rexistrada en bien de grabaciones que continúen siendo una audición obligada pa les nueves xeneraciones.

1897 ochobre 24. Prudencio Merino Álvarez, “El Polenchu”, ñaz na villa de Gráu. Ye otru de los grandes cantadores de los que nun se caltién nenguna grabación, a pesar de que fuera tentáu con bien de contratos discográficos. Acabada la guerra civil marchó al exiliu y morrió en Tánger.

1900 mayu 10. Joaquín Martínez González, “Xuacu’l de Sama”, ñaz n’Uviéu. Trabayó de cantreru dende bien neñu y entró pronto nel Coro Santiaguín. Morrió a los 35 años, tiempu asgaya pa contar con una llexón de siguidores, siendo les sos grabaciones toa una referencia inda anguañu.