Ismael González Arias.- En 1999, el Cancioneru de Mieres “Les 40 Principales” dexó constancia de la previvencia de los cantares de chigre: aquellos que tol mundu sabía cantar y, polo tanto, yera quién a sumase al coriquín improvisáu. La primer edición del llibru, de mil exemplares, agotóse nuna selmana. Al añu siguiente sacóse la segunda edición que volvió repitir l’éxitu de la primera.

Cantares que formaben parte de la memoria colectiva de tolos asturianos: “Villaviciosa hermosa”, “Chalaneru”, “Soi de Verdiciu”, “A la mar fui por naranjas”, “Fuisti al Carmín de la Pola”, “Baxaron cuatro ayeranos”, “Fui al Cristu y namoréme”, “En el campu nacen flores”, “Asturies, patria querida”… y asina, hasta un total de 40 cantares, colos que s’asonsañaba’l títulu d’un conocíu programa radiofónicu.

Diez años más tarde, el trabayu de campu amplióse al restu d’Asturies y publicóse en collaboración col diariu La Nueva España, el llibru “99 cantares asturianos: cancionero popular”. Un trabayu nel que volvía a apostar por esos cantares que tol mundu conoz.

Estos dos trabayos, acompañaos de lletra, partitura y comentariu del cantar, veníen a completar un llargu númberu de cancioneros particulares que dende diba años veníen publicándose, la más grande parte d’ellos en fotocopia y que servíen de referencia a la xente nos chigres pa sumase al coriquín imporvisáu.

Pero, a partir de toos esos trabayos, descubrióse la existencia d’una bona riestra de cantares mui populares, que’l tiempu diba borrando que teníen autor conocíu y que, la mayor parte de la xente que los cantaba, pensaba yá que se trataben de cantares tradicionales.

Esti ye, por orden de frecuencia, los más empleaos d’estos cantares. Los diez qu’integren el Top Ten de la música popular asturiana d’autor:

1 “Gozoniega”, de Marcos de Torniellu (José Benigno García): “Soi de Verdiciu / nacía a la vera…” Una habanera cubana a la qu’esti poeta de primeros de sieglu XX punxo lletra nueva.

2 “Mocina dame un besín”, de Antolín de la Fuente: “Mocina dame un besín / pa guardalu hasta que vuelva…” Obra reciente d’esti compositor xixonés fallecíu en 1997, que la compuso pa coro.

3 “Pescadores”, de Manuel Carrizo: “Aún no ha salido el sol / el suelo brilla…” Cantar que popularizaron dúos como Almas Unidas na década de los setenta, a partir de la composición d’esti músicu pop xixonés.

4 “Covadonga”, de Mely Duver: “Cuando yo fui a Covadoga / volví con desilusión…” Otru gran éxitu a partir de versiones de dúu como la d’Almas Unidas de la década de los setenta, d’esta compositora nacida en 1927.

5 “La panderetera”, de Martínez Abades: “Yo soi la panderetera / meyor d’Asturias…” Un pasudoble del que munchos nun conocerán la lletra, pero del que toos saben la música (especialmente los gaiteros), y que compuso a primeros de sieglu XX esti xixonés pa la cupletista La Argentinita.

6 “Axuntábense”, de Sergio Domingo: “Axuntábense, axuntábense / con una xiblata al pie d’un tonel…” Enorme éxitu de lo que fuera orixinalmente una composición coral de Sergio Domingo y que siempre se canta aprovechando la presencia d’un cantador de tonada que fai un solo en mitá de la pieza.

7 “Na veira do mar”, de María Ostiz: “Ojos verdes son traidores / azules son mentireiros…” Una composición d’esta cantante pop na década de los sesenta qu’acabando arransando nos chigres.

8 “La romería”, de Víctor Manuel: “Van subiendo loz mozos / colos corderos al hombro…” Otra pieza que venía del ámbitu del pop y que fue’l primer gran éxitu de públicu d’esti cantante mierense.

9 “Gijón del alma”, de Javier Díaz: “Esta villa marinera / de mi tierra asturiana…” El cantar más recientemente n’incorporase al repertoriu popular d’esti compositor uviín autor d’otros grandes éxitos del pop nacional, como “El tractor amarillo”.

10 “La mina y el mar”, de José León Delestal y Casanova: “Dicen que va baxu’l mar / la mina de La Camocha…” Cantar orixinalmente compuestu pa un discu de Joaquín Pixán, acabó pasando al ámbitu de la tonada y d’ehí al chigre.

Conclusiones que puen sacase d’esti ránking de cantares. La primera, cuatro tan compuestos n’asturianu (“Gozoniega”, “Mocina dame un besín”, “Axuntábense”, “La mina y el mar”), dos en castellanu (“Gijón del alma”, “Pescadores”), tres n’amestao asturianu/castellanu (“Covadonga” , “La panderetera”, “La romería”) y ún n’amestao gallegu/castellanu (“Na veira do mar”).

Segunda conclusión: la mayor parte d’esti repertoriu ye reciente, de los últimos cuarenta años, y provién del ámbitu del pop llixeru (Manuel Carrizo, Mely Duver, María Ostiz, Víctor Manuel y Javier Díaz). N’importancia siguen les pieces de compositores clásicos (Delestal/Casanova, Sergio Domingo, Antolín de la Fuente y Martínez Abades.

Y una última, siéntese la influencia de la música llatinoamericana n’habaneres como “Gozoniega” y “Mocina dame un besín”, y boleros como “Pescadores”, “Covadonga” y “Gijón del alma”. Como tamién del pasudoble, con exemplos como “La panderetera” y “Na veira do mar”. Y, reconozse fácilmente la influencia de la copla en “La mina y el mar”.

Notándose, en too ello, la enorme importancia del éxitu popular d’interpretes como Almas Unidas, María Ostiz, Duo Costa Verde, Victor Manuel, Viente Díaz, o Víctor, qu’interpretaron o siguen interpretando bona parte d’esti repertoriu. De la xeneración actual tienen versiones de cantares d’esti repertoriu intérpretes como Anabel Santiago, Fernando Valle Roso o Berto Varillas.

Lo qu’evidencia, tamién, que nun quedó malapenes constancia na memoria popular de temes del rock de los setenta, del folk celta de los ochenta o del Xixón Sound de los noventa.