El xuez de l'Audiencia Nacional Fernando Andreu cree que los expresidentes de Bankia y Caja Madrid Rodrigo Rato y Miguel Blesa "consentiríen, aceptaríen y favoreceríen" l'usu indebíu de fondos de la entidá per mediu de l'atribución y usu en provechu propiu de 'tarxetes B', qu'entregaron amás a conseyeros y directivos sin controlar la xustificación de los gastos nin existir un sustentu contractual pa ello.
El maxistráu pronúnciase asina nel autu dictáu esti xueves nel qu'acusa a los banqueros de la comisión d'un delitu d'alministración deslleal ya impón-yos el pagu d'una fianza en conceptu de responsabilidá civil de 16 millones d'euros pa Blesa y trés millones pa Rato.
L'instructor asegura que dambos presidentes utilizaron "en provechu propiu" les tarxetes y entregáronles a miembros del Conseyu d'Alministración, de la Comisión de Control, conseyeros executivos y directivos, lo que "supunxo la percepción per parte d'estes persones de cantidaes en conceptu distinto del retributivu".
L'escándalu conocióse dempués de que Bankia treslladara al so principal accionista, el Fondu de Reestructuración Ordenada Bancaria (FROB), un informe y un CD col detalle de movimientos bancarios qu'esti organismu treslladó a la Fiscalía Anticorrupción.
El fiscal xefe Anticorrupción, Antonio Salinas, xudicializó l'asuntu'l pasáu 24 de setiembre al treslladar a l'Audiencia Nacional les dilixencies qu'abriera a primeros de mes por posibles delitos societario d'alministración deslleal y apropiación indebida.
El xuez Fernando Andreu, qu'asumió estos fechos al instruyir el 'casu Bankia', preguntó al Bancu d'España si conocía la existencia d'estes tarxetes y pidió-y que, nel marcu del informe pericial que ta realizando sobre les práctiques na entidá, analice si'l so usu pue constituyir un delitu d'alministración deslleal.
