Madrid (E.P.) .-La ONG Melillense Prodein publicó un nuevu videu rodáu esti miércoles, tres l'últimu intentu de saltu en grupu de la valla que muestra como a un inmigrante, forzáu a baxar pela escalinata instalada pola Guardia Civil, los axentes golpiénolu en delles ocasiones y acaba inconsciente nel suelu. Tres lo que paecen intentos por espertalu, los guardies llévenlu garráu n'alto a Marruecos.

   Trátase del segundu videu que publica esta organización que lleva más d'una década documentando vulneraciones de Derechos Humanos na valla fronteriza. Nesta ocasión, Prodein sigue cola cámara a un mozu qu'identifica como Dany, camerunés de 23 años, que xunto a un centenar d'homes, subiérase a la valla tres l'intentu de saltu rexistráu na zona de Villa Pilar. La organización tovía nun pudo comprobar si ta vivu o muertu.

   La imaxe muestra como'l mozu empieza'l descensu de la valla hasta la escala que pa tal fin apoyó la Guardia Civil contra les rexes. Una vez asitiáu sobre los peldaños, recibe dellos golpes, impactando dos d'ellos aparentemente na cabeza. Acaba cayendo al suelu, onde paez quedar inconsciente.

   Darréu, vese cómo dos axentes arrastren el cuerpu pa separalu de la escalera ya intenten sin éxitu sentalu. Dempués d'unos minutos nos que'l migrante permanez inmóvil nel suelu, dos axentes más avérense y ente los cuatro, carguen con él hasta un llugar más estremáu de la valla, onde lu arratren hasta'l marxe de la carretera.

   Más axentes avérense ya intenten sentar el cuerpu del mozu utilizando hasta una porra pa caltene-y la espalda derecha, primero, y palantre, dempués, porque cai escontra los llaos. A lo último váltenlu de llau cola cabeza sobre la calzada, gárrenlu ente cinco pelos pies y les manos (un axente usa la so porra p'aguantalu del llombu) y asina, crucen la puerta de serviciu de la valla hasta'l llau Marroquín.

   En tola grabación, que dura unos cinco minutos, nun s'aprecia que'l mozu recupere en nengún momentu la consciencia. Prodein diz que recibió informaciones contradictories al respecto, pues unes persones afirmen que'l camerunés resultó muertu y otres afirmen que tovía ta vivu. Nel videu nun s'observa que recibiera nenguna atención médica en suelu español.