Esti xueves, 16 d’cochobre, tuvo llugar na sala máquines del pozu San Luis de La Nueva de Llangréu la presentación de la nueva edición del Concursu de la Canción de les Mines.

Presideron l’actu’l director del periódicu El Comercio, l’alcaldesa de Llangréu, la directora de Política Llingüística de la Conceyería de Cultura y Francisco Torre, director del Concursu de la Canción de les Mines, que faló de cómo esti sábadu que vien entamará la edición con más grande númberu de participantes, yá que, hasta’l momentu, supérense’l centenar y mediu d’inscritos nes diferentes modalidaes en competición.

Abrióse l’actu cola intervención d’un cantador de tonada y cerróse con un pequeñu conciertu de la Banda Gaites de Llangréu que presentaba’l so nuevu trabayu discográficu, al que yá-y dedicamos una creítica n’Asturias Mundial, va dalgo menos d’una selmana, con motivu de la so salida al mercáu.

Con esti Concursu en marcha, queda nos próximos díes que los concursos Cuenca del Caudal y Ciudá d’Uviéu entamen igualmente col so calendariu de competiciones. A ellos va sumase a primeros de xineru’l concursu de L’Entregu, que garrara un nuevu puxu na pasada edición.

De manera qu’esti sábadu, nel salón d’actos de La Nueva de Llangréu, entama la primera de les eliminatories del Concursu de la Canción de les Mines y, al sábadu siguiente, nel Auditoriu Teodoro Cuesta de Mieres, va arrancar la gala de presentación del Concursu de Canción Asturiana y Ayerana Cuenca del Caudal, en Mieres del Camín.