L'Executivu comunitariu denunció amás que les autoridaes españoles nun-y notificaron esti nuevu réxime fiscal, pese a que taben obligaes a facelo.

   La decisión de Bruxeles nun identifica a les empreses que tienen de devolver ayudes nin tampoco cuantifica la cantidá de sovenciones que van tener que reembolsase. Correspuende agora a les autoridaes españoles establecer la llista d'empreses que se beneficiaron d'esti réxime y les ayudes que tienen que devolver.

   "España tien que recuperar de los beneficiarios les ayudes incompatibles percibíes. Son sumes que van volver al Estáu español", esplicó'l voceru de Competencia, Antoine Colombani. "Nun pueo pronunciame sobre los beneficiarios y les sumes porque son les autoridaes españoles les que tienen de tresmitir esta información", señaló.

   En cualquier casu, el voceru precisó que la midida cuestionada permitía amortizar el fondu de comerciu mientres 20 años y "parte d'estes deducciones tovía nun s'aplicaron". Amás, cuando Bruxeles abrió la so investigación sobre esti réxime en xunetu del 2013 yá ordenó a España que suspendiera cualquier pagu adicional.

   L'Executivu comunitariu yá declaró illegal n'ochobre del 2009 y en xineru del 2011 la versión orixinal d'esti réxime y esixó la devolución de parte de les ayudes (les que se concedieron dempués del 21 d'avientu del 2007). España comprometióse entós a nun aplicalo a nuevos demandantes, pero nun suprimió les disposiciones porque delles compañíes podíen siguir beneficiándose.

   Sicasí, en marzu del 2012, el nuevu Gobiernu de Mariano Rajoy adoptó una nueva interpretación alministrativa vinulante, que permite de forma retroactiva deducciones fiscales non solo pa les alquisiciones directes sinón tamién pa les alquisiciones indirectes.