Ente los pocos trabayos nuevos que surden del ámbitu de les bandes de gaites, ye bienllegáu esti “Con dos roncones” de la Banda Gaites de Llangréu, acabante de salir de la mano de la discográfica A Mansalva.

A los propios músicos de la banda gaites xúntase pa esti trabayu xente de los Coros Padre Coll, Voces Blanques del Nalón, Nuestra Señora del Carmen, Añorances, Maestru Lozano y Santiaguín. Xunto a otros músicos como Alberto Rionda, a la guitarra elléctrica, Anxo Pintos, a la zanfona, Sergio Rodríguez, al baxu, Rodrigo Sturm, a la guitarra, Rodrigo Roces, al acordión, Juanjo Díaz, al caxón, o Adrián Moro, al piano, ente bien d’otros. Xunto a xente de los grupos Duerna y Felpeyu. Arriendes de la collaboración de los hermanos Marisa y Fernando Valle Roso.

Nel discu, un bon puñáu de cantares, con un percorríu por bien de xéneros, dende la “Diana floriada”, cola qu’abre, hasta’l “Himnu de Llangréu”, col que pieslla. Depués de pasar por marches, tonaes, muñeires o entemedios.

Un discu necesariu pa da a conocer un trabayu interesante dende va bien de tiempu y qu’agora llega en formatu cedé baxo’l títulu de “Con dos roncones”, grabáu nos Estudios Tutu de Los Campos (Corvera), baxo la dirección de Sergio Rodríguez.