El Memorial Silvino Argüelles volvió ser la referencia de lo Meyor de la tonada asturiana del añu. 28 ediciones respalden esti festival que, a los llargo de los últimos 13 años, vien premiando a les 10 Meyores Voces de Canción Asturiana del Añu y al Meyor Gaiteru Acompañante de Tonada.

L’éxitu d’esta convocatoria radica nel so Xuráu y nel fechu de facer públicu’l resultáu de cada una de les votaciones. Nes dos últimes ediciones, según diben sucediéndose les votaciones, fueron publicándose al traviés del facebook de Culturamieres y del programa “Sones” de TPA. Cola suma de les 14 votaciones del Xuráu dióse a conocer el llistáu de premiaos.

Los 14 Xuraos representen tolos ámbitos de la canción asturiana: cantadores (Diamantina Rodríguez), expertos en tonada y musicoloxía (Félix Martín, de la Universidá d’Uviéu; Javier d’Arroes, colleccionista; Juan Manuel Martín, de l’Asociación Cantu la H.orma; y Javier Parajón, alcalde de Sariegu), responsables de concursos de canción asturiana (Facundo Fernández, del Cuenca del Caudal; Francisco Torre, de La Nueva; y Juan Carlos González, del Ciudá d’Uviéu), periodistes musicales (Vanessa Gutiérrez, d’El Comercio; Saúl Fernández, de La Nueva España; y Miguel Fernández, de RNE Radio 5) y del programa “Sones” (Sonia Fidalgo, presentadora; Alberto Cienfuegos, presentador; y Laude Martínez, rexidor).

Los 10 ganadores de la presente edición, que pasen por ello a formar parte del “Hall of Fame” de la canción asturiana, fueron los siguientes: Belén Arboleya, Liliana Castañón, Lorena Corripio, Andrés Cueli, Álvaro Fernández Conde, María Llatores, Juan Robledo, Anabel Santiago, Jorge Tuya y Marisa Valle Roso. Vicente Prado “El Pravianu” resultó escoyíu como Meyor Gaiteru Acompañante de Tonada.

El Memorial Silvino Argüelles crióse un añu depués de la muerte del cantador mierense, tou un referente dientro del mundu de la canción asturiana. Nos sos primeros años, el Memorial tuviera organizáu por un grupu d’amigos y collaboradores rellacionaos cola hostelería de la plaza de Requexu de Mieres del Camín. A partir de 2003, pola procupación causada nel momentu de qu’aquel pudiera ser l’últimu añu de la so organización, la conceyalía de cultura del Ayuntamientu de Mieres pasó a facese cargu de la organización.

Nel presente, alredor de 30 cantadores y 5 gaiteros inscribieron el so nome nel palmarés del Memorial Silvino Argüelles. Ellos son les grandes voces del sieglu XXI, les que meyor representen el meyor momentu pol que pasara enxamás la tonada asturiana.